TURA: East Garo Hills a·jani Rongrong Union Deficit UP School-o MTET donggijagipa mandeko skigipani kamna ra·a ine A·chik Organisation for Social Welfare (AOSW) matnangatenba, iani bidingo nanga gita ja·kurangko de·china School Education & Literacy-ni Director-na sedoataha.
School Education & Literacy-ni Director-na sedoatgipa chittio AOSW-ni parakatani gitade, ia skulo skigipani kamna ia bilsini February 24 tariko, skulni headmaster, dingtangmancha advertisement-ko on·ahachim aro uandaken ia kamna sak 13 candidate-rang dorgasto gale, saksku candidate-rang interview-ko mikkangpaahachim. Indake ong·genchimoba, ia skigipani kamna MTET pass ka·gimin candidate-rangko gale, MTET donggijagipa candidate-kosa ra·skaaha ine AOSW matnangataha.
“Ia skigipani kamna dorgasto galani bon·kamgipa salko March-ni 11 tarikna donate, interview ra·ani tarikko March 16 tarikona advertisement-o donsoahachim. Joltangni candidate-ko mikkang niani donggen ineba advertisement-o janapani dongani gimin MTET certificate donggipa saksa joltangni candidate-an ia kamna galahachim indiba kamna ra·anio uko galchange, May-ni 2 tariko DIET result man·gipa aro MTET donggijagipa gipin songni candidate-kosa ra·skaaha,” ine AOSW-ni general secretary Premiar N Sangma parakataha.
Nanga gita poraiani gadang donggijagipa mandeko ia skulo skigipani kamna ra·ani gimin sing·doatengon, ia skulni kosako aro district education official-rangni kosako nanga gita ja·kurangko de·china AOSW-ni general secretary, School Education & Literacy-ni Director-ko didiataha
