SHILLONG: 2023 bilsini Assembly election sepangbaroroengahaon, MDA sorkariko dilenggipa National People’s Party (NPP) aro opposition Trinamool Congress (TMC) dolni gisepo matnanggrikanirangba batrorobaengaha.
NPP-chi dilenggipa MDA sorkariko tangka paisa jakkalsretanina aro dingtang dingtang kamrangko ka·sretanina TMC dolni dilgipa matnangtokengon, maming sakki ba kakketko mesokani gri matnanganiara tol·gipasan ong·aia ine NPP-ni state president aro Rajya Sabha-ni MP WR Kharlukhi parakataha.
TMC-o maming sakkirang dongjani giminsa kachariona re·angna pa·jaenga ineba ua parakataha.
“Ia pilakan TMC dolni NPP-chi dilenggipa MDA sorkarini kosako tol·e matnanganirangsan ong·aia,” ine Kharlukhi aganaha.
NPP-chi dilenggipa sorkarini chu·sokgijanirangko dongnuna gitasa NPP-ni dilgiparang, opposition dolko matnangskaenga ine aganinaba NPP-ni state president, TMC-ni dilgipa George Lyngdoh-ko matnangataha.
“Manderangni ka·donge seokani ja·manba manderangoni an·pile katgipa mandede kakket ong·ani gimin ma·sijawa,” ine ua aganaha.
“2018 bilsio a·dokni manderang, sak 20 Congress MLA-rangko seokahachim indiba ia MLA-rang, TMC-ona wate kattokaha. TMC-de da·o janggil gita napbagipa dolsan ong·aia aro election-ni biteko ma·sikujaenga,” ineba Kharlukhi aganaha.
2023 bilsini election ja·manba iandakgipa manderangde doltangko wate gipin dolona kataigen ineba ua aganaha.