SHILLONG: Shillong songjinmani Mawlai-o rikenggipa Shillong Government College of Engineering-ko Budbar salo, a·dokni Chief Minister Conrad K Sangma nieaha.
Ia college-ko rikna gita RUSA 1.0 New Professional College-ni ning·o tangka paisarangko chame on·ahachim aro ia college-ko bakan nokdonggae on·na ka·dongsoengachim.
Ia engineering college-ko nieani somoio a·dokni Chief Minister baksana, Education department-ni Commissioner & Secretary BDR Tiwari, Education department-ni Secretary aro RUSA Meghalaya-ni State Project Director Ambrose Ch Marak, RUSA Meghalaya-ni Principal Consultant Rangksan Mawroh, Education department-ni official-rang aro gipinrangba dongpaaha.
Official-rangni u·iatani gitade, ia Shillong Engineering College-ko North Eastern Hill University (NEHU)-ni bak ong·atgen.
Indake ong·engon, ia apsan salon, a·dokni Chief Minister, Shillong Civil Hospital-o taridapenggipa Cancer Wing-koba nieaha.
Shillong Civil Hospital-ni Cancer Wing-ko COVID sajinmani somoio COVID ward dake jakkalahachim aro da·o ia Cancer wing-o cancer sagipa manderangko donchakna gita sorkari taridapengahachim.
