SHILLONG: Re·anggipa Sombar salo, ‘Sitrang’ balminduri balani Meghalaya a·dokni dingtang dingtang biaprangonaba sokbae, bang·a nokdangrangan nokgri jamgri ong·na nangtokahani gimin ia balminduri balanichi neng·nikanirangko man·enggipa nokdangrangna pilakni gitan dakchakanirangko on·na a·dokni Chief Minister Conrad K Sangma ku·rachakaniko on·ataha.
Chief Minister-ni parakatani gitade, balminduri balanio a·dokni bang·bata a·jarangon nangchakeaniko man·angaha aro neng·nikanirangko man·enggipa nokdangrangna sorkari, nanga gita dakchakanirangko on·engaha.
Balminduri balanichi a·sel ong·anirangko ma·sie ra·na gita ua dingtang dingtang deputy commissioner-rang baksa video conferencing gita tom·e chanchirimangaha ineba Chief Minister parakataha.
“Balminduri balanio badia badia biaprang nangchakeaniko man·bataha chinga aditade ma·sie ra·na man·aha aro Revenue & Disaster Management department-ko man·chape dingtang dingtang department-rang, kamrangko ka·na a·bachengaha,” ine Sangma aganaha.
Neng·nikanirangko chagrongna nanggipa nokdangrangna pilak nanga dakchakanirangko on·na jotton ka·enga aro duko ga·akenggipa manderangna sorkarini on·enggipa dakchakanirangko sokate on·na deputy commissioner-rangba rakbee kamko ka·enga ineba Chief Minister parakataha.
“Balminduri balanichi bang·a biaprangon bijolirangba nosto ka·ako man·angaha aro MeECL-ni manderang, wal sal kamrangko ka·e bang·bata biaprangon bijoliko on·piltaina man·aha. Chinga konta 24-ni gisepon pilak biaprangon bijoliko chu·gimik on·piltaina ka·dongenga,” ine Sangma aganaha.
Balminduri balanichi a·dokni bang·a biaprangon bol wa·arangni be·anichi ramarang aro manderangni nok-jamrang nosto ka·ako man·ahaoba da·o bang·bata biaprangon ramarangko aro nok-jamrangko taripile on·na man·engaha ineba Chief Minister parakataha.
