SHILLONG: East Garo Hills a·jani Rongjeng jolo donggipa Imsamdrop songo Jal Jeevan Mission (JJM)-ni kamrangko matchotgija ka·aha ine songni manderang matnangatani ja·man, iani bidingo sandirokatna gita a·dokni PHE Minister Renikton Lyngdoh Tongkhar, ku·rachakaniko on·ataha.
PHE Minister-ni parakatani gitade, da·o dipet iani bidingo ua an·tangde maming koborrangko man·soa dongkujachim.
“Iandake matnangenggipani bidingo anga an·tangde mamingkoba ma·sia dongkuja indiba anga iani bidingo sandirokatgen aro East Garo Hills a·jao ia project-ko nirokenggipa official-rango sing·sandiatgen,” ine Tongkhar, kobor ra·timgiparangna parakataha.
Imsamdrop song jolo songdongenggipa manderangni parakatani gitade, ia songo JJM-ni kamko chu·gimik matchotaha ine a·kangengoba, songni bang·bata nokdangrangonan chi pipe-rang sokangkujachim aro chi pipe-rangko man·gimin nokdangrangba da·alonan chi tingtotsakoba man·kujaengachim.
Imsamdrop songo JJM-ni kamko ia bilsini gisepo saksa Sahidur Rehman minggipa contractor-na on·ahachim aro ia kamna gong lak 41-mangko una chame on·ahachim. Ia songo JJM-ni kamko matchotaha ine ua a·kangengoba, bang·bata nokdangrangan chi pipe-rangko man·kujaengachim aro chi pipe-rang soke man·gipa nokdangrangba chikon man·skakujaenga ine songni manderang matnangatahachim.
Ia kamko matchotaha ine mesokna gita PHE-ni overseer, songni dilgiparangko cha·bokaha ineba songni manderang matnangatahachim.
Garo Hills-ni bang·bata biaprangon JJM-ni kamko contractor saksanasan on·aiaha ine matnangenggipani gimin sing·on, kamko contractor saksanasan on·aia ine matnanganiko PHE Minister jegalatskaenba, chonchongipa project-rangkosa joltangni contractor-rang ka·enga indiba dal·dalgipa aro mongsongbatgipa kamrangkode, ia project-ko jako ra·na kragipa contractor aro company-rangnasa on·aha ine talataniko on·angaha.
Meghalaya a·dok gimiko kam ka·enggipa JJM-ni kamrangni gimin janapatskaengon, kamrangko da·o bang·gija percent-chi tang·doangaha ine Tongkhar parakataha.
“Da·o mikkang jarangode somoirang namna ka·dongengani gimin chinga kamrangko ta·rakbate matchotatna ka·dongenga,” ine PHE Minister aganaha.
