SHILLONG: Tangka paisani gita a·dok sorkarini dakchakanirangko ra·e, ‘me·mang’ skulrangko chalaienggiparang donggenchimode rakgipa ja·kurangko de·gen ine Bristibar salo, a·dokni Chief Minister Conrad K Sangma mikrakataniko on·angaha.
Shillong-ni College of Teacher Education (PGT)-na gital rikdapgipa nokrangko do·ga oe on·angani ja·mano kobor ra·timgipa manderang baksa agangrikengon, da·o dipet a·doko me·mang skulrang donga ine sakkirangkode man·kuja indiba bimang donggijagipa skulrangba a·doko dongani cholrang dongaia ine Chief Minister aganaha.
Sangma-ni aganani gitade, badiaba biaprango skulrang dongeba chatro chatrirang komigiparang dongengnaba gnang aro iandake sorkarini tangka paisarangchi me·mang skulrangko chalaienggiparang dongbebegenchimode sorkari nanga gita ja·kurangko de·anggen.
Adita salrangna skang, Shillong songjinmao jingjengatenggipa skigiparangko tear gas godapani gimin sing·on, iani bidingo sorkari report-na sengengkua aro ua an·tangde iandake so·sojengjeng ong·anirangko namnikgipa ong·ja ine Chief Minister aganaha.
“Angni bebera·anide agangrikanichisa an·ching pilak kamkon chu·sokatna man·a,” ine Sangma aganaha.
A·ningni bosturangoniko a·dok sorkari, bilsiantian gong kror 50-oni kror 60-mangona kajinarangko man·enga ine janapatengon, ia kajinarangara lekka porani kamrangna miksonge ra·gipasa ong·achim aro skangode ia tangka paisarangko lekka porani kamrangna jakkaljachim indiba NPP-chi dilenggipa MDA sorkari, ia tangka paisarangko lekka porani kamrangna jakkalengaha aro ia tangka paisarangchian LP aro higher secondary skul nokrangko rikenga ine Chief Minister parakataha.
Meghalaya a·doko dam 16000-mangni gita skulrang donga ine janapatengon, ia skulrangko sorkari komiatna aro chipe donna man·jawa ine Chief Minister parakataha.
Indake ong·engon, a·doko mitam skulrangde name dakna man·jaenga aro pass ka·ani percentage-rangba nama ong·jaenga ine Chief Minister aganenba, a·doko bang·en skulrangni neng·nikanirang dongkuenga ine parakataha.