SHILLONG: New Shillong Township-o Gital Secretariat-ko rikna gita A·dok Sorkari bon·kame a·ako namedake nigen.
Secretariat-ko rikna gita nidinge dongipa a·ako Chief Minister Conrad Sangma nieaha, a·a namen chu·onga aro Shillong songjinmaoniba bang·e chel·ja ine aganaha.
Sorkari biap damgniko nie donenga, jeon damsade Mawpdang jolo ong·a ineba CM aganaha.
“Badiao rikode manderangna subita ong·batgen uko chinga nienga” ine aganengon, biaprangko dingtang dingtang department-rangna sualaha, unigimin tik ka·taianiko dakna nangnaba donga, Pa Sangma aganaha.
Biap nie dongimin 220 acre mang donga, jean Secrertariat-ko rikna gita namen chu·onga, jeon gipin department-rangko aro administrative office-rangko Mawpdang-o rikna nangskanaba donga ineba ua aganaha.
Indake ong·engon tik ka·na nanggipa adita mamlarang donga, jerangkon Cabinet-o chanchie tik ka·anggen, CM aganaha.
