TURA: South West Garo Hills a·jani Jewilgre songo bilsi 16-mangna nosto ong·e dongenggipa Anganwadi centre-ko da·onan taripile on·kujaenga ine kobor on·aha.
Anganwadi worker saksani parakatani gitade, ia Anganwadi centre-ko 2005 ba 2006 bilsio mikka balwa ta·rakangani somoio nosto ka·angahachim indiba da·onan ia centre-ko taripile on·a dongkujaengachim.
“2005 ba 2006 bilsimango mikka balwa ta·rakange ia anganwadi centre-ko dal·begipa bol pangsa be·dapaha indiba da·alonan ia centre-ko taripile on·a dongkujaenga,” ine ia songo Anganwadi-ni kamko ka·enggipa mande saksa parakataha.
Iani bidingo Social Welfare department-na baditaba chang u·iatahachim indiba da·alonan maming ja·kurangko de·a dongkujaenga ineba Anganwadi worker parakataha.
“Ia centre-ko taripile on·china changni chang u·iatani ja·manoba maming dakchakanirangko man·jaengani gimin chinga da·o mamingkoba dakna man·jaengaha,” ine ua aganaha.
Anganwadi worker-ni parakatani gitade, Jewilgre songni Anganwadi centre nosto ong·ahani a·sel, ia centre-na watatenggipa ma·manti cha·ani bosturangkoba donchakna biaprang dongjaengani gimin ua bosturangko an·tangni nokosa donchakskana nangengachim.
“Da·ode ia anganwadi centre-ni sambao songni community hall-ko rikahani gimin anga songni manderango aro department official-rango sing·chengenba, anganwadi centre-ni bosturangko ia songni community hall-o donchengna man·skaengaha,” ineba ua parakataha.
