SHILLONG: A·dokni chadamberangna kam ka·e cha·ani cholrangko on·jaenga ine sorkarini kosako matnange Federation of Khasi Jaintia & Garo People (FKJGP) dolni gita re·jomaniko ong·atanio, dosgri manderangko skatang doka sata dakani gimin Sukrobar attamo a·dokni police-rang, Laitumkhrah police station aro Sadar police station-o minggni dake mokordomako ka·doangaha.
“Ia a·sel ong·gipani bidingo Laitumkhrah PS aro Sadar PS-o minggni dake chinga mokordomako ka·aha aro ramao re·ruraenggipa dosgri manderangko kragija dokahani gimin niamo pangchake ja·kurangko de·anggen,” ine Sukrobar attamo police official saksa parakataha.
Indake ong·engon, ia a·selni bidingo koborko man·soani kri police-rang nanga gita ja·kurangko de·enga aro niamo pangchake ja·kurangko de·anggen ine a·dokni Deputy Chief Minister Prestone Tynsong parakatskaaha.
“Niam retirangko rakkianiode chinga pangnan police-rangna nangani kri ja·kurangko de·na bil on·ronga aro da·al obosta ong·gipani giminba anga uamang baksa agangrikmanaha,” ine Tynsong aganaha.
Iani bidingo ain gita kamrangko ka·enga ine janapatengon, mikkangchi iandakgipa obostarang ong·taijana gita sorkari, dingtang dingtang a·jani SP-rangna ge·etaniko on·manaha ine Deputy Chief Minister parakataha.
FKJGP dolsan ong·aigija je dolrangba iandakgipa re·jomanirangko aro tom·anirangko ong·atna man·aia indiba iandakgipa a·selrang ong·jana gita dilgiparang, an·tangtangni membor-rangko simsakna nanga ineba ua aganaha.
“Na·simang tom·tome re·jomaniko ba jekoba dakna man·aia indiba ka·sapae iandake so·sojengjeng ong·atani kamrangko ka·pajachina,” ine Deputy Chief Minister, NGO-rangko mol·molataha.
