TURA: 2020 bilsio South West Garo Hills a·jani Mahendraganj jolo donggipa mande saksako rim·gittangani gimin South West Garo Hills a·jani District & Session Judge, ia mandeko rim·gittanganio jak donggipa mande sakbriko bilsignina pattoko donatan baksana gong 10,000-ko dai gamchina rai on·ataha.
South West Garo Hills a·jani Superintendent of Police (SP)-ni u·iatani gitade, Rongsang Abagre Construction Site-o kamko ka·enggipa Bagicha songni Md Abdur Rahim minggipa mande, an·tangni kam ka·enggipa biaponi gimaenga ine 2020 bilsini July 17 tariko police-rang koborko man·soahachim. Iani bidingo koborko man·soa bakan police-rang, mokordomako ka·e, ia mandeko sandina a·bachengataha.
Am·sandianirangko dakon, ia mandeko rim·gittanggipa mande sakbri, chong·motan Tangbath R Sangma, Lahen Ch Marak, Rengan Ch Marak aro Chensbath A Sangma minggipa manderangko police-rang rim·na man·aha aro rim·gittanga man·gipa mandekoba police-rang jokatna man·aha.
Dos dakgipa manderangko rim·ani ja·man, ia a·selko am·sandigipa investigating officer SI Gaurav B Koch, ia mande sakbrini kosako 2020 bilsini September 23 tariko charge sheet ka·aha aro uandaken ia mande sakbrini kosako South West Garo Hills a·jani District & Sessions Court-o bichal ka·na a·bachengataha.
Ia mande sakbriko bichal ka·ani, ia 2022 bilsini September 21 tariko matchotaha aro uandaken ia mande sakbriko bilsignina pattoko donchina aro gong 10,000-ko dai gamchina rai on·ataha.
