SHILLONG: Meghalaya a·dokni skotong Shillong songjinmaoni a·songni dingtang dingtang biaprangona sildoreng bilruraaniko bariatna gita ja·kurangko de·engani gimin Sombar salo, Meghalaya BJP-ni state president Ernest Mawrie, a·songni Prime Minister Narendra Modi-ko mittelpilataha.
Mawrie-ni parakatani gitade, indita bilsirangna Shillong airport-ko jakkalgija galchipe donahachim indiba a·songni Prime Minister Narendra Modi-ni dilanichi ma·mong sorkari ja·kurangko de·ahani a·sel da·alo japrakon hajalni hajal manderang, ia airport-oni dingtang dingtang biaprangona songreangna man·skaengahachim.
“Shillong airport-oni dingtang dingtang biaprangona sildoreng bilrurana a·bachengahani gimin anga dingtangmancha an·chingni Prime Minister Narendra Modi-ko mittelpilna ska maina ia pilakan an·chingni Prime Minister Narendra Modi-ni niksamsoe kam ka·ani, uni salgro salaram a·dokrangna simsak nirokani aro BJP-ni namroro silroroaniko ra·bana kam ka·ani a·sel ong·aha,” ine BJP-ni state president parakataha.
Shillong-oni Assam a·doko donggipa Lilabari-ona Alliance Air sildoreng bilruraaniko a·bachengate on·ahani gimin ua dingtangmancha Union Civil Aviation Minister Jyotiraditya Scindia-koba mittelpilataha.
Re·baenggipa bilsio Meghalaya a·doko gital sorkariko rikani ja·man BJP dol, Shillong-oni mongsonggipa biaprangona sildoreng bilruraataniko a·bachengatangkugen ineba Mawrie parakataha.