SHILLONG: National People’s Party (NPP)-chi dilenggipa Meghalaya Democratic Alliance (MDA) sorkario bakrimaniko Bharatiya Janata Party (BJP)-ni agananiara ‘ka·dingani’ kattasan ong·aia ine Sukrobar salo, NPP-ni state president aro Rajya Sabha-ni MP WR Kharlukhi parakataha.
MDA sorkario bakrimaniko watani bidingo chanchina gita Meghalaya a·dokni BJP, ma·mongni dilgiparangna pakwate on·manahachim ine nikna man·a.
“MDA sorkario bakrimaniko watna agananiara mamingba ong·ja indiba ka·dingani kattasan ong·aia,” ine Kharlukhi aganaha.
MDA sorkario bakrimaniko jasani gisepon watgnok ine September jani 3 tarikon Meghalaya a·dokko nirokenggipa BJP-ni dilgipa M Chuba Ao parakatahachim ine nikna man·a. Uni ia kattako aganaoni da·o jagni batangpilengahaoba BJP dol, MDA-o bakrimaniko watskakujaengachim.
Indake ong·engon, Himachal Pradesh a·doko ong·atenggipa Assembly election matchotahaon, Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkario bakrimaniko watani bidingo ma·mongni Bharatiya Janata Party (BJP) dilgiparang chanchianggen ine Meghalaya BJP-ni state president Ernest Mawrie parakatskaaha.
Mawrie-ni parakatani gitade, Himachal Pradesh-o ong·atenggipa Assembly election-o re·baenggipa November 12 tariko matchotengani gimin iani ja·man, NPP-chi dilenggipa MDA sorkario bakrimaniko watama watjawa uko ma·mongni BJP dilgiparang chanchianggen.
Meghalaya a·dokni pilak dam 60 constituency-rangon susagen ine BJP-ni manchienggipani gimin sing·on, BJP-ni dam 60 constituency-rango susaaniko NPP ra·chakaia maina jakgitelgipa a·songode darangba election-o susaaniko champengna man·ja ine NPP-ni state president parakataha.
Election sokbaengahani gimin MDA-o bakrimenggipa pilak dolrangni gisepon chanchianide dingtanggrikaigen ine janapatengon, political dol ge·antion an·tangtangni nisan aro miksonganirang donga ine Kharlukhi parakataha.
Election-ni ja·man BJP baksa nangrime sorkariko rikani bidingo sing·on, election-ni ja·manosa iani giminde chanchigen ine NPP-ni state president parakataha.
“Chinga bang·bate seat-rangko chena ka·dongsoenga aro chinga man·aba man·aigen,” ine ua aganaha.
