SHILLONG: Special Force (SF-10)-ni commandant Gabriel K Iangrai-ko rim·aniara police headquarter-o garirangko jakkalsretahani giminde ong·ja indiba police department-ni nokrangko rikna chamgipa tangka paisarangko jakkalsretani giminsa ong·a ine Bristibar salo, a·dokni Chief Minister Conrad K Sangma talataniko on·angaha.
Chief Minister-ni parakatani gitade, police-rangni headquarter-o garirangko jakkalsreta ine matnanganiara kakket ong·ja indiba ian nokrangko rikna chamatgipa tangka paisarangko jakkalsretanisa ong·achim.
“Police department-ni nokrangko rikna gita chamatgipa tangka paisarangko jakkasretaha ine matnanganirang ong·kataha aro iani bidingo FIR-ko ka·aha. Iani bidingo sandirokna gita sorkari hukumko on·manaha aro niamo pangchake dos donggipa manderangni kosako ja·kurangko de·anggen,” ine Sangma aganaha.
National Emergency Response System (NERS) Public Safety Answering Point (PSAP)-ko rikanio tangka paisarangko jakkalsretaha ine matnanganirang ong·katahani gimin Shillong Sadar Police Station-o FIR ka·ani ja·man, SF-10 sipai dolni commandant GK Iangrai-ko police-rang rim·ahachim.
NERS PSAP project-na Home Ministry, gong lak 95.78 tangkarangko watatahachim aro ia kamko a·dokni gitcham Assistant Inspector-General of Police (Administration) GK Iangrai jako ra·enba, completion certificate baksana gong lak 95.78-ni tol·gipa Utilisation Certificate (UC)-ko ua on·ahachim.
Iani bidingo inquiry dol, sandirokaniko dakon, estimate ba DPR-koba man·jahachim aro file-o Sadar Traffic Branch-ko taridapna chamgipa gong lak 3-ni hisapkosan man·aiahachim.
