NPP sorkario manderang suk ong·tokjaengani gimin 2023 bilsio dingtanganiko nikgen: Mukul

TURA: Meghalaya a·doko NPP-chi dilenggipa MDA sorkarini cha·bokgipa kamrangna a·dokni manderang suk ong·tokjaengahani gimin re·baenggipa 2023 bilsini Assembly election ja·mande sorkario dingtanganiko nikna man·gnok aro ia sorkariko Trinamool Congress (TMC) rikgen ine Opposition dolni dilgipa Mukul Sangma parakataha.
Bristibar salo, TMC-ni tom·bimonganiko Rangsakona constituency-o ong·atanio Sangma ia kattarangko aganaha.
“Anga jechiba re·angbo, Khasi Hills, Jaintia Hills ba Garo Hills-ba ong·ja maina, pilakan ia sorkarini kamrangni gimin matnange agananirangkosa anga knana man·rongaia. Ia manderang chinga sorkario ong·jaengani gimin suk ong·tokjae chingko sorkario ong·atna nangniktokenga. Manderangni iandake chingo ka·donganiko nikesa re·baenggipa Assembly election-o chinga chegen ine anga ka·dongenga aro chinga cheasan ong·aigija a·doko pilakni gitan namroro silroroaniko ra·bapilna gita bilaken re·bapilna sienga,” ine TMC-ni dilgipa, Rangsakona constituency-ni Ambari songo parakataha.
Ia tom·bimonganiko ong·atanio TMC-na chakpaenggipa manderangoni sak 7000-na baten manderang tom·chimongbatokaha aro ia tom·bimonganio AITC-ni MLA-rang aro MDC-rangba dongpae bakko ra·angtokaha.
Meghalaya a·doko namroro silroroaniko ra·bana maming skanirang dongjani giminba Sangma, NPP-chi dilenggipa MDA sorkariko sing·doangaha.
“Uamangni ku·sikchi aganenggipa namroro silroroaniara bao? Uamangni bilsi bongana sorkariko chalaianio uamangni matchote on·gipa rama dilsakoba angna mesokeni. Uamangni da·o jako ra·e ka·enga ine a·kangenggipa ramarang pilakan chingni somoio ra·gate on·gipa ramarangsa ong·a,” ine ua aganaha.
Garo Hills-o manderangni janggi tanganiko dingtangatna miksonge gitcham sorkarini ra·gatgipa project-rangko ia sorkari ra·gale galpilaha ineba TMC-ni dilgipa matnangataha.
Sangma-ni parakatani gitade, Williamnagar-o Simsang chibimako kabatna gita dolong ge·sako gitcham sorkari on·ahachim indiba ia dolong rikani project-ko NPP-chi dilenggipa MDA sorkari ra·galahachim.
“Ia sorkari IBDLP-ni kamrangkoba dontongataha aro model residential skulrangba indin ong·e dongaiengaha. Ia tangkarangara a·doko songdongenggipa manderangni ong·jama?” ine Sangma sing·doangaha.
Party-ko bilakbatatna gita NPP, sorkarini dingtang dingtang kolrangko jakkalenga ineba TMC-ni dilgipa matnangataha.