SHILLONG: North Shillong constituency-o Bharatiya Janata Party (BJP)-na kam ka·enggipa bang·bea manderang, National People’s Party (NPP)-o napangtokaha aro ian re·baenggipa 2023 bilsini Assembly election-na skang a·doko NPP-na bilakbatataniko ra·baani gita ong·aha.
Koborko on·ani gitade, Sonibar salo, BJP North Shillong-ni president Alwyn Lyngdoh-ko man·chape BJP-na kam ka·enggiparangoni sak 370-na baten NPP-o napangaha.
BJP-ni membor-rangko rimchaksona gita NPP-ni tom·aniko Lawmali-ni Dorbar Hall-o ong·atangaha aro ia tom·anio North Shillong constituency-ni NPP candidate Ransom Sutnga, NPP Shillong City-ni president Lamphrang Kharmujai aro gipin dilgiparangba dongpae bak ra·angaha.
Ia tom·aniko ong·atanio North Shillong constituency-ni NPP candidate Ransom Sutnga, tom·anio bak ra·giparangna aganprakengon, All India Trinamool Congress (AITC) North Shillong-ni membor-rangba bakan sak 100-na bate, NPP-o napna sienga ine parakataha.
BJP-oni ong·kate NPP-o napangskaani gimin kobor ra·timgiparangna talataniko on·angengon, BJP North Shillong constituency-ni ning·o ma·sichakgrikanirang dongjani gimin ua BJP-oni ong·kate NPP-o napskana tik ka·aha ine Alwyn Lyngdoh parakataha.
BJP-oni susana miksongenggipa candidate sakgni, chong·motan MH Kharkhrang aro M Kharsyntiew sakgnikon uamang namniktokjani gimin BJP-oni ong·kate NPP-o napskana tik ka·aha ineba ua parakataha.
