Sorkario ka·dongani dongjahani gimin manderangni bebera·aniko MDA man·pilna nangenga: UDP

SHILLONG: National People’s Party (NPP)-chi dilenggipa Meghalaya Democratic Alliance (MDA) sorkario manderangni ka·donganiko gimaatahani gimin MDA sorkari, manderangni bebera·aniko man·pilna nangenga ine MDA-ni bak ong·enggipa United Democratic Party (UDP)-ni general secretary Jemino Mawthoh janapatenba, re·baenggipa 2023 bilsini Assembly election-o vote-rang priprajawa aro manderangni namgnina kam ka·enggipa dolnasan manderang pu·ongen ine an·tangni ka·dongchakenganiko parakataha.
“Manderang da·o sorkario ka·donganiko gimaatahani gimin chinga manderangni ka·dongani aro bebera·aniko man·pilna nangenga. Ia sal somoirango UDP-na balwa balaniko aro manderangni ka·dongchakanirangko nike anga, re·baenggipa bilsini election-o vote-rang priprajawa indiba manderangni namgnina kam ka·enggipa dolkosa seokgen ine ka·dongenga,” ine Mawthoh parakataha.
“Ia changode manderang, dingtang dingtang dolrangna pu·onjawa ine anga ka·dongengaa aro chinga a·dokko dilna man·na gita chingna cholko on·china nangnikenga,” ineba ua aganaha.
UDP-ba NPP-chi dilenggipa MDA-ni bakan ong·ani gimin bang·a changon opposition dolrang, uamangko nangchongmotgipa kamrangni bidingo ku·rangko on·jaenga ine matnangenggipani gimin sing·on, manderangni nangchongmotgipa kamrangna UDP maming saloba jrip dongjaha aro bijolini bidingo matnangani somoirangoba uamang, a·dokni Power Minister aro MeECL-ni CMD-ko kam watchina dabiahachim ine UDP-ni general secretary parakataha.
“Chinga ku·rang on·gija jrip donggenchimode chinga an·tangtangba ia kamrango jak dongpagiparang ong·genchim indiba chinga darangkoba chel·chakjaenga aro pangnan manderangni namgninasa chanchie kamko ka·rongenga,” ine Mawthoh aganaha.
Ong·gija dakgipa kamrangna aro tangka paisarangko jakkalsretanirangna UDP pangnan ku·rangko on·enga ine janapatengon, manderang pangnan kakketko ma·sie ra·na nangani gimin uamang maming saloba jrip dongna man·jawa ine Mawthoh parakataha.
Home Minister-ni kamko watchina gita UDP-ni MLA-ko aganahani gimin UDP-ni ning·o maiba ma·sisretgrikanirang ong·katahama ine sing·on, darangba niamna batna man·jawa aro pangnan maiba kamni gimin chanchiengon UDP dolni gitasa apsan chanchie ja·kuko de·enga ine UDP-ni general secretary parakataha.
Skigiparangni jingjengatengmiting somoio police-rangni tear gas-rangko godapaniara namen kraani ong·jaha ine janapatengon, ia kamko district administration-na jako ra·ahani gimin Home Minister-de ia a·selni bidingo mamingkoba ma·sijahachim aro police-rangsa kragija dake tear gas-rangko godapaha ine Mawthoh parakataha.
2023 bilsini election-o UDP-ni cholrangni gimin janapatskaengon, “Obostarangko nigenchimode re·baenggipa salrango UDP dolan mongsonggipa dol ong·gen. Chinga badita seat-rangko chegen, uni giminde anga aganjaenga indiba chinga bilakbatrorobaenga aro iachi chinga chu·sokgipa ong·na ka·dongenga,” ine Mawthoh aganaha.