TURA: Garo Hills-o songdongenggipa manderangna dingtang Garoland a·dokko Garoland State Movement Committee (GSMC)-ni gita dabidilengon, dingtang dingtang gittimrango songdongenggipa manderang baksa ku·mong nangrime kamko ka·anichi Garoland a·dokna dabianiko bilakbatatna tik ka·angaha ine GSMC-ni assistant general secretary Cyril A Sangma parakataha.
Sangma-ni u·iatani gitade, re·anggipa November-ni 7 tariko Lower Hawakhana-o donggipa Silanggre gittimo songdongenggipa manderangni okamatako man·e GSMC-ni dilgiparang, ia gittimona re·ange apsan chanchirimanirangko dakangon, Silanggre gittimo songdongenggipa manderangba Garoland a·dokna dabianio bakrimaniko on·na gita ku·rachakaniko on·ataha.
“Silanggre gittimo songdongenggipa manderangni ching baksa Garoland a·dokna dabianio ka·oksibee re·ongkatbaanina chinga kusi ong·a aro uamangko mande ra·bee rimchaksoa. Mikkangchiba chinga dingtang dingtang gittimrango songdongenggipa manderang baksa Garoland a·dokna bilakbate dabiangkugen,” ine GSMC-ni assistant general secretary Cyril Sangma parakataha.
Ia tom·anio GSMC-ni co-chairman Balkarin Ch Marak-ba dongpae bak ra·angaha.
