SHILLONG: Jal Jeevan Mission (JJM)-ni kamrangko chu·sokatanina Meghalaya a·dokba boksisrangko man·aha indiba a·doko bang·bata nokdangrangan chi pipe-rangko soke man·tokskakujaenga.
JJM-o see rakkianiko parakani gitade, Meghalaya a·doko gimik 6,30,357 nokdangrang donga aro da·o dipet 2,63,651 nokdangrangsan chi pipe-rangko man·engkuani gimin a·doko chi pipe-rangko man·ani 41.83 percent-san ong·kuengpiti.
Meghalaya a·doko gimik dam 6,491 songrang gnang aro ianoni dam 1,478 songrangosan 100 percent ba chu·gimik nokdangrang chi pipe-rangko soke man·tokkuenga. Ia dam 6491 songrangoni dam 2,970 songrangode da·o kamrangko ka·engkua indiba dam 2043 songrangode kamrang a·bachengsrangkujaengachim.
Meghalaya a·doko chi pipe-rangko man·gipa a·jarangoni da·o dipet South West Garo Hills a·jao 67.40%, East Garo Hills-o 66.80% aro Ri Bhoi a·jao 55.75% ong·e nambatgiparang ong·enga indiba komibatsranggipa a·jara 29.43% ong·e West Khasi Hills a·ja ong·skaenga.
Meghalaya a·doko JJM-ni kamrang chu·sokani 41 percent batahani gimin a·song gimikni 36 percent-na bate nambatenga ine adita salrangna skangsan, Union Jal Shakti Minister Gajendra Singh Shekhawat-ba Meghalaya a·dokko mittelpilangahachim.