TURA: Mongolbar salo, Tura Don Bosco College (DBC) baksana Meghalaya AIDS Control Society (MACS) nangrimenba, Zonal Level Red Ribbon Club Quiz competition-ko Don Bosco College-ni Bosco Hall-o ong·atangaha.
Ia quiz competition-ko ong·atanio Tura Civil Hospital-ni Pathology, Specialist Dr Zeany T Ch Momin, mongsonggipa sokgipa ong·e tom·anio bak ra·giparangna aganprakengon, a·doko HIV/AIDS sabisiko chel·chakna gita rakbee kamko ka·na nangenga ine parakataha. HIV/AIDS sabisiko chadamberangsa man·rongbata ine janapatengon, ia sabisiko man·anichi mandeni janggi tangani aro nokdangkoba rusina man·a ine Dr Momin parakataha.
An·chirangko on·gile manderangni janggirangko jokatna gita manderangko didina nangenga ineba ua aganaha.
Quiz competition-ko ong·atanio Tura Don Bosco College skanggipa ong·aha aro Mendipathar College, gnigipa ong·skaaha. Ia dolrang da·o Shillong-o ong·atna sienggipa State Level Red Ribbon Quiz Competition-o Garo Hills Zone-ni pal bakko ra·angskagnok.
Ia quiz competition-ko ong·atanio dongpae jinmana aganprakanggipa gipin manderangara, Shillong MACS-ni Assistant Director (IEC) Alexander Kharkongor, Tura Don Bosco College-ni ning·o donggipa Red Ribbon Club-ni Nodal Officer Dr Barbara S Sangma aro Don Bosco College-ni Principal Fr Bivan Rodriques Mukhim ong·a.
