TURA: South Garo Hills a·jao gital Siju Community & Rural Development (C&RD) Block-ko Mongolbar salo, a·dokni Chief Minister Conrad K Sangma do·ga oe on·angaha aro ia gital Block-ko do·ga oe on·anganio Assembly-ni Deputy Speaker Timothy D Shira, Rongara-Siju MLA Rakkam A Sangma, Rongjeng MLA Jim Sangma, Williamnagar MLA Marcuise Marak, Kharkutta MLA Rupert Momin, GHADC-ni CEM Albinush Marak aro gipin dilgiparangba dongpae bak ra·angtokaha.
Ia Siju C&RD Block-ko do·ga oe on·angani somoio a·dokni Chief Minister, jinmana aganprakangengon, ia gital Block-ko a·dokni skanggipa Chief Minister aro Meghalaya a·dokko man·na krengdilgipa Captain Williamson A Sangma-na on·kangangenba, ia gital Block-ko kulianichi Siju jolrango donggipa dingtang dingtang songrangoba namroro silroroaniko ra·bana dakchakani ong·gnok ine parakataha.
A·doko pilakni gitan namroro silroroaniko ra·bana uni sorkari kam ka·enga ine janapatengon, a·doko songdongenggipa manderangni janggi tangani gadangko dingtangatna gita sorkari, dingtangmancha ramram manderangna dingtang dingtang program-rangko a·bachengate on·aha ine Sangma parakataha.
“Siju-Rongara jolrangara Meghalaya a·dokni itihaso namen gamchatbegipa biap ong·a maina ian Tribal manderangko aro uamangni bilrangko chel·chakna gita rakbee warachakgipa aro a·dokni skanggipa Chief Minister Capt Williamson Sangma-ni atchiram song ong·a,” ineba Chief Minister aganaha.
Meghalaya a·dokni bilsi 50-na re·mikkangbaanio bang·a dilgiparangan a·dokni namroro silroroanina on·giltokaha ine janapatengon, dingtang dingtang kamrango da·oba a·dok ja·manchakengkua aro uni sorkari a·dokko ra·doangkuna gita nisanrangko done kam ka·enga ine Sangma parakataha.
“Da·o mikkang bilsi 50-ni gisepo chingni Meghalaya a·dokko nangnikani gita ong·atna niksamsoe aro chanchisoe kamko ka·na nangenga,” ine ua aganaha.
Siju C&RD Block-ko do·ga oe on·anganio Atongrangni Chugan chrokaniko aro dingtang dingtang dolrangni git ring·anirangkoba nikangna gita man·aha.
