TURA: Niam gita election-ko ong·ate jinmani namnike seokgimin Rongsak Village Court-ni gital Lasker-ko jegalatahani gimin Meghalaya Janata Dal (United)-ni general secretary Joshua Ch Marak-ba GHADC-ni chief executive membor Albinush Marak-ko matnangataha.
Adita salrangna skang, A·chik Organisation for Social Welfare (AOSW) dolni songbadrango parakatani gitade, Rongsak Village Court-ni election-ko ia bilsini August 24 tariko ong·ate gital laskar Janggin T Sangma-ko seokahachim indiba ia laskar-ara GHADC-ni Executive Committee (EC)-ko chalaienggipa dolni membor ong·jani gimin ia laskar-ko GHADC-ni CEM ra·chakjahachim.
Iani bidingo GHADC-ni CEM-ko jegalatengon, “Rongsak Village Court-ni election-ko ong·ate nokmarangni seokgimin laskar-ko GHADC-ni CEM jegalaha ine NGO-rangni songbadrango seataniko poraisomane anga namen duk ong·aha. Garo Hills-o donggipa NGO-rang aro Nokmarang, A·chik jatni daka rikaniko aro niam retiko rakkina rakbee kam ka·engon, iandake political dolrangsa jatni niamrangko re·badena jotton ka·skaenga,” ine Meghalaya JD(U)-ni general secretary Joshua Marak parakataha.
Koborko on·ani gitade, Rongsak village court-ni gital laskar-ko seokna gita election-ko ia bilsini August 24 tariko ong·atna GHADC-ni Rural Administration u·iataniko on·ahachim aro ia election-o mande sakgittam, chong·motan Janggin T Sangma, Kewingson Marak aro Arbitson Sangma susaangahachim.
“Rongsak village court-ni ning·o sak 46 A·king Nokmarang dongachim indiba sak 46 A·king Nokmarangoni sak 39-san gital laskar-ko seokna pu·onaiaha aro ianoni sak 5-ni vote-rangkode jegalahani gimin sak 34 A·king Nokmani vote-rangkosan ra·aiaha. Ia election-o Janggin T Sangma, ge 31 vote-rangko man·e chegipa ong·aha, Kewingson Marak ge 2 vote-rangko man·e gnigipa ong·skaaha aro Arbitson Sangma-de vote ge·sakosan man·skaaiaha. Election-o cheani ja·man Janggin T Sangma-ni bimingko ra·chakna gita GHADC-ni chief executive membor (CEM) Albinush R Marak-ona wataton, ia election-ko una u·iatchenggija ong·ataha ine aganenba, ua gital seoka man·gipa Janggin T Sangma-ko ra·chakna jechakaha aro iako ua an·tangan re·anggipa November 1 tariko AOSW-ni membor-rang baksa uni office-o tom·e chanchirimengmiting somoio ku·rachakaha,” ine AOSW-ni general secretary parakatenba, gital seoka man·gipa Rongsak village court-ni laskar-ko GHADC-ni CEM, NPP-ni membor ong·jani giminsa jegalaha ine matnangatahachim.
Village court-rangni gital laskar-rangko seokna nangon GHADC-ni ning·o donggipa Rural Administration-ni official-rangnasa bilko on·manahani gimin uamangsa election-ko ong·atna man·achim aro uandaken Rongsak village court-ni gital laskar-ko seokna gitaba August-ni 24 tariko election-ko ong·atchina GHADC-ni Rural Administration-sa ge·etaniko on·ahachim ineba ua parakataha.
Indake ong·engon, 2023 bilsini Assembly election aro 2024 bilsini MDC election-o JD(U) chegipa ong·e sorkariko rikna man·genchimode jatni daka rikanirangko chel·chakna aro Nokmarangna bilrangko on·dapna gitasa jotton ka·gen ine Meghalaya JD(U)-ni general secretary parakatskaaha.
