TURA: Adita salrangna skang, Meghalaya Janata Dal United-ni dilgiparang, gital membor-ko doltangona rimchaksoaha ine kobor on·aha.
JD(U)-o napanggipa gital membor-ara Bina Rosaline A Sangma ong·achim aro uko JD(U)-ni dilgiparang, Tura-ni Rikman Complex-o dingtangmancha tom·aniko ong·atenba rimchaksoaha.
Koborko on·ani gitade, JD(U)-ni gital membor Bina Rosaline A Sangma, re·baenggipa 2023 bilsini Meghalaya Assembly election-o North Tura constituency-oni susana sienga.
JD(U)-ona napangani somoio Sangma, jinmana aganprakengon, “An·chingo songsalni aro chadamberangni bilgriroroenganiko nike anga namen duk ong·a, uni gimin anga chadamberangna kamko ka·na gita re·ongkatenga,” ine parakataha.
Sangma-ko rimchaksoanio Meghalaya JD(U)-ni convenor Robinus T Sangma-ba jinmana aganprakengon, re·baenggipa 2023 bilsini Assembly election-na JD(U) dolni gita candidate-rangko sandiengaha aro a·dokni pilak kona noksikrangon uamang candidate-rangni susana sike tikit bi·anirangko man·soengaha ine parakataha.
“Meghalaya a·dokni pilak biapranon manderang, JD(U)-oni skanirangko parake tikitrangko bi·engani gimin chinga ia election-o Meghalaya a·dokni pilak dam 60 constituency-rangon susana ka·dongenga. Chinga tikitrangko on·engkon skatang on·enga ong·ja indiba namgipa candidate-rangko baseesa on·enga,” ine Meghalaya JD(U)-ni convenor aganaha.
Gital membor-ko rimchaksoani somoio JD(U)-ni national secretary Sanchumo Lotha aro gipin dilgiparangba dongpae bak ra·angaha.