RESUBELPARA: North Garo Hills a·jani Kharkutta constituency-o MLA scheme-ni bang·a bakrangon kamrangko lekkarangode matchotaha ine seahaoba kamrang matchotkujaenga ine jolo songdongenggipa manderangni matnanganina Kharkutta-ni MLA Rupert Momin talataniko on·angaha.
Kharkutta constituency-o MLA scheme-rangko sualani bidingo RTI ka·ani ja·man, bang·a scheme-rangan gimaenga ine constituency-ni ning·o donggipa mitam manderang matnangtokengachim ine nikna man·a.
Kharkutta-ni saksa Pranton Marak minggipa mandeni matnangatani gitade, RTI-ko man·soani ja·man scheme-rangko sualani bidingo uamang am·sandianirangko dakon, gong lak 20 tangkarang koros ong·e bregipa garbage van (jabol galgipa gari) bolgni aro water tanker (chi salgipa gari) bolgniko Kharkutta-ni MLA on·jaha ine nikna man·ahachim.
Koborko on·ani gitade, ia project-ara 2017-18 bilsini project ong·achim.
Iandake matnanganina talataniko on·angskaengon, jabol galgipa gari aro chi salgipa garini pal, ia constituency-o songdongenggipa manderangna jakkaltona gita dal·bata gariko breskana nange ia project-ko dingtangatna nangaha ine Kharkutta MLA Rupert Momin parakataha.
“Chingni project-rangoni mingsaba tol·gipa dongja aro anga manderangni namgninasa kamrangko ka·enga. Chinga pilak scheme-rangkon chu·sokatna kam ka·enga aro mitamrangnade chinga an·tangtangni tangka paisarangkoba on·dappilenga,” ine Momin parakataha.
Kharkutta aro Adokgre songrango gong lak 5-ni solar light-rangba gimaenga ine matnanganina talataniko on·angskaengon, ia songrango solar light-rangko donatna skang uamang ramarangko apalbatatchengenga aro ramarangko apalbatani kamrang matchotahaon, solar light-rangko ia songrango chatgnok ine MLA parakataha.
Ia project-rangko matchotna gita da·o somoirang dongkuenga aro da·o uamangna dongimin term matchotna skangan ua ia project-rangko matchote on·gen ineba Momin parakataha.
