SHILLONG: Office-tangtango asonge dongaigija, songadam nokadamrangona re·ange manderangni nanganirangko nirok sandichina gita Rajya Sabha-ni MP aro BJP-ni dilgipa Rakesh Sinha, a·dokni MLA aro MP-rangko didiataha.
Sonibar salo, Kongthong song, jekon ‘ku·simitgipa song’ ine mingsing minggamtokachim, ia songni welcome gate-ko kulie on·angani somoio jinmana aganprakangengon, dilgiparangni daitoara manderangna nanganirangko sokate on·anisa ong·a ine Sinha aganaha.
“Kongthong songna namroro silroroaniko ra·baanisande angni daito ong·ja indiba songo noko chu·onggijanirangko chu·sokatani aro manderangna mangrakbataniko on·aniba angni daito ong·a. Joltangni MLA aro MP-rang, an·tangtangni constituency-o diltubatsranggipa biaprangonaba re·ange manderangko grongena nanga. Uamangni daitoara Parliament-o ba uamangni office-rango asonge donganisan ong·ja,” ine ua aganaha.
Dilgiparang aro manderangni gisepo aro mongsongbate songadam nokadamrango bang·en gapatna nanganirang dongenga ine janapatengon, iarangko dilgiparang ta·raken namatna nanga ine Sinha aganaha.
Rajya Sabha MP-ni parakatani gitade, Meghalaya a·doko ku·rachakani aro bang·en dingtanganirang ong·engahaoba ramram manderangde neng·nikanirangko chagrongna nangtokkuengachim.
Skanggipa manderangnasa dangdike on·china gita manderangni seoke watatenggipa dilgiparangko a·songni Prime Minister Narendra Modi didirongachim ine janapatengon, manderangni seoke watatenggipa dilgipa aro uamangni kamrang namen dingtanggrikrongengani gimin iako ra·galna nangenga ine Sinha parakataha.
Meghalaya a·doko mikka waanirang komiengahani gimin, buring bolgrimrang porongrong ong·roroangengahani gimin aro niam gri a·ningni bosturangko bikotengani gimin janapatengon, a·doko mitam manderang, samtangtango ong·telaigiparangko nisie galanichi an·tangtangna man·dapanirangko rikenga ine Sinha, suk ong·gijaniko parakataha.