SHILLONG: Meghalaya a·dokni chadamberangna kamrangko ka·e cha·na cholrangko on·jaenga ine sorkarini kosako jegale Federation of Khasi, Jaintia & Garo People (FKJGP)-ni jinma re·jomaniko ong·atanio dos gri manderangko kragija dake doka sata dakani bidingo FKJGP-ni dilgiparangko police-rangni okamate sing·sandie rona jotton ka·engani gimin FKJGP-ni dilgiparangko iandake sinjete rojachina sorkariko mikrakataha.
FKJGP-ni president Dundee Cliff Khongsit-ni parakatani gitade, ia a·selni bidingo uko man·chape FKJGP-ni dingtang dingtang dilgiparangko police station-ona okamatenba, sinjete rona jotton ka·engachim.
“Jingjengatenggipa dolni dilgiparangko sing·sandiani kamara police-rangni Kaman ong·a aro iakode chinga jegalenga ong·ja indiba dongimin arina batjachina chinga a·dok sorkari aro police-rangna mikrakataniko on·enga,” ine Khongsit parakataha.
Sorkari aro police-rang, uamangko sinjete rona jotton ka·angkugenchimode uamangba warachakna gita cholrangko niskana nanggen ineba Khongsit aganaha.
“Police-rangni chingko sing·sandianiara indin coaching class-ko ra·ani gitasan ong·aienga. Indake ong·genchimoba chinga a·doko chadamberangni neng·nikanirangko namatna gita sorkarini kosako jingengatanirangko dakangkugen,” ine FKJGP-ni president parakataha.
Khongsit-ni aganani gitade, kamrangko ka·e cha·na cholrangko man·jaengani a·selan Meghalaya a·dokni chadamberang maming ka·donga gri ong·na nangtokengahachim.
“Chadamberangna kam ka·e cha·ani cholrangko on·jaengani gimin chinga da·o changsataie jingjengataniko daktaina nanggenchimode chadamberang, an·tangtangni ka·o nanganiko mesoktaiani cholrang dongaia,” ine ua aganaha.
Re·anggipa October-ni 28 tariko ong·anggipa a·selni bidingo police-rang, FKJGP-ni president baksana vice president Kitboklang Nongphlang, organizing secretary Kharkupar Nongsiej, general secretary Eldie K Lyngdoh aro senior vice president Elton C Warjri-ko dingtang dingtang police station-rangona okamate sing·sandiahachim ine nikna man·a.
