TURA: A·dok sorkarini ra·gatgipa Farmers Collectivisation for Upscaling Production & Marketing System Plus (FOCUS+) scheme-ni namgnirangko ra·na man·na gita December 4 tarikni gisepon an·tangtangko biming segatchina gita Mongolbar salo, a·dokni Chief Minister Conrad K Sangma, game ge·e cha·enggipa manderangko didiangaha.
Ia FOCUS plus program-ara, Meghalaya a·doko game ge·e cha·enggipa manderangni namgnina ra·gatgipa dal·batsranggipa program-ni ra·dodapatenggipa program ong·a aro ia program-ni ning·o biming segatgimin manderang, gong 5000 tangkako sorkarioniko man·engachim.
Ia FOCUS plus-ni bidingo talataniko on·angengon, a·dok gimiko lak 4.5 game ge·e cha·giparangna namgni ong·gipa FOCUS program-ni chu·sokgipa ong·aniko nike sorkari, ia FOCUS plus-ko ra·gatdape on·aha ine Chief Minister parakataha.
Chief Minister-ni parakatani gitade, Producer group-rangko bikotgipa manderang, chong·motan game ge·e cha·giparangna ia FOCUS program-ni ning·o sorkari dakchakanirangko on·engachim.
Iako a·dokni Chief Minister, Mongolbar salo, North Garo Hills a·jani gital A·dokgre C&RD Block-ko songe on·angani somoio jinmana parakangaha.
Ia tom·bimonganiko ong·atanio ua songni manderangna FOCUS plus card-rangkoba suale on·angjolaha aro ia program-ni ning·o biming segatgipa manderang, biming segatani somoio gong 1000-ko aro gong 4000-ko gnigipa bak dake an·tangtangni account-rango man·sogen ineba Chief Minister parakataha.
