TURA: Re·baenggipa 2023 bilsini Assembly election-o National People’s Party (NPP) dol, Garo Hills-o dambonga ba damdok seat-rangna bate chena man·jawa ine Mongolbar salo Opposition Trinamool Congress (TMC)-ni dilgipa Mukul Sangma parakataha.
Mongolbar salo, Meghalaya TMC-ni tom·bimonganiko West Garo Hills a·jani Rajabala-o ong·atanio Sangma, ia kattarangko aganaha.
Ia tom·bimonganiko ong·atanio Mukul Sangma-na agreba, Rangsakona-ni MLA Zenith Sangma, Balachanda-ni MDC Agassi Marak aro TMC-ni dingtang dingtang dilgiparangba dongpae bakko ra·angtokahachim.
Ia tom·bimonganio Opposition dolni dilgipa, hajal kotok manderangna aganprakangengon, nama bewalo dilgipako seokna nangani giminba aganangaha.
“An·chingni a·songode manderangchisa a·songko chalaia aro uan democracy-o bakko ra·e dilgipako seokanian ong·a. Uni gimin a·songni aro songsalni namgnina a·songo songdonggipa mande sakantian an·tangtangna on·gimin bilko jakkale ia dilgipako seokako bakko ra·na nangchongmota,” ine Sangma aganaha.
An·tangtangko bame on·gipa bobil dolni manderangna dakchakanirangko on·ani bidingo janapatengon, “Da·o sorkariko chalaienggipa manderang, a·doko mande so·otani, mande rim·gittangani aro gipin ong·gija dakgipa kamrang komiahani gimin Assembly-o rasong dake aganenga indiba iandake ong·gija kamrangko bon·atna gita sawa kamko ka·chengaha aro sawa bobil dolni manderangko tom·tomaona rimbaaha? Angni chief minister ong·engmiting somoio tom·tomaniko ra·bapilna gita chinga dingtang dingtang cholrangko ra·e kam ka·aha,” ine Opposition TMC-ni dilgipa parakataha.
Bangladesh a·songni jakgitel ong·ani ja·man border haat-rangko chiptokahachim ine janapatengon, “Angni chief minister ong·engmiting somoirango ia border haat-rangko kulipiltaie on·aha aro anga an·tangan haat damgnikode kulie on·ahachim. Indiba ia MDA sorkarini somoio ia haat-rango bading chiwalgipa manderangko seokna committee-ko songaha aro an·tangtangni manderangnasan ia biaprango bading chiwale cha·na cholrangko on·skaengaha,” ine Sangma parakataha.
2023 bilsini Assembly election-o NPP, Garo Hills-o dambonga ba damdokna bate seat-rangko chena man·jawa ine janapatengon, “Iako NPP doltangni survey ka·anion ma·sina man·aha aro ian angni sandie man·gipa ong·ja,” ine Sangma parakataha.
