TURA: Tura-ni MDC aro Meghalaya BJP-ni state vice president Bernard N Marak-ni kosako ka·gipa pilak case-rangna jaminko on·ani ja·man Budbar salo kachari uko jakgitel wataha.
Marak-ni kosako POCSO case-rangko man·chape dingtang dingtang case-rangko West Garo Hills a·jani police-rang ka·ahachim indiba uni kosako ka·gipa chu·gimik case-rangna jaminko on·ani ja·man Budbar salo kachari, Marak-ko police-rangni jakoniko jakgitel wataha.
Tura MDC-ni kosako ka·gipa case-rangoni minggni case-rangko skanggipa Meghalaya High Court, re·anggipa September jani 30 tariko jamin watahachim aro ia minggni case-rangara, Arms Act aro Immoral Trafficking ba mande palbadinganio nangchakegipa case-rang ong·achim.
Uni ja·man Marak-ni kosako police-rangni ka·gipa case, chong·motan POCSO Act-ni ning·o ka·gipa case-koba October-ni 27 tariko, Tura-ni District & Sessions Court jamin on·taiahachim.
Marak-ni kosako ka·gipa bon·kamgipa case-koba Mongolbar salo, Meghalaya High Court-o hearing dakenba jamin on·aha aro uandaken bon·kamao Marak-ko Budbar salo kachari, jakgitel wataha.
Tura MDC-ni kosako a·dok sorkari, minggipin case-ko ka·dapna miksongsoanirang dongengako nike, Marak-ni nokdangni manderang, una anticipatory bail-na dorgastoko Sombar salo galsamsoskaahachim.
Marak-ko jakgitel watani ja·man BJP-ni manderang aro una chakpaenggipa bang·bea manderang, uko rimchaksotokaha aro una ka·dongatanirangkoba on·angtokaha.
Indake ong·engon, Tura-ni MDC Bernard Marak-ko jakgitel watani ja·man Meghalaya BJP-ni state president Ernest Mawrie-ba, uni kosako sorkari maming sakkirang dongjani a·selan ua jakgitel ong·piltaina man·aha ine parakataha.
“NPP sorkari, Bernard Marak-ko pattoko chipe donna jotton ka·beoba da·alo police-rangni jakoniko jakgitel wataha. Marak-ni kosako matnanganirangko dake case-rangko ka·ahaoba maming pangchakani aro sakkirang dongjani gimin ua jakgitel ong·piltaina man·aha,” ine Mawrie parakataha.
Tura-o Bernard Marak-ni mingsingbaroroengako ma·sie aro re·baenggipa bilsini election-o amako man·na kenesa a·dokni Chief Minister Conrad Sangma, Marak-ni kosako tol·e case-rangko ka·na jotton ka·ahachim indiba kakketan da·o chegipa ong·aha ineba BJP-ni state president parakataha.
“Re·baenggipa bilsini Assembly election-o Tura-ni manderangba NPP sorkariko ra·galsrangna manchitokmanaha aro iako ma·sisoesa a·dokni Chief Minister, BJP-ni state vice president-ko pattoko chipe donna jotton ka·ahachim,” ine Mawrie parakataha.
Assembly election-o constituency damgnioni susagija South Tura constituency-on BJP-ni candidate Bernard Marak baksa susachina gitaba Mawrie, Conrad Sangma-ko ra·biataha.
