TURA: An·tangni kosako tol·e matnangenba pattoko donataniara, re·baenggipa 2023 bilsini Assembly election-o chena gita una cholrangko nambatatani gitasa ong·aha ine Budbar salo pattokoni jokbagipa aro Tura-ni BJP MDC Bernard N Marak parakataha.
Marak-ni parakatani gitade, a·dokni manderang, NPP-chi dilenggipa MDA sorkarini kamo kusi ong·tokjaengahani gimin re·baenggipa 2023 bilsini Assembly election-o a·dokni manderang dingtanganina pu·one MDA sorkariko ra·galatgnok.
Uko potchipdrake rim·anio NPP dolsa dakdilgipa ong·achim ine janapatengon, ia a·sel ong·aniara unade namgnisa ong·pilgnok maina manderang ia sorkario ka·dongna man·tokjaha ine Marak parakataha.
“Batanggimin somoirangode manderang, songsalna dingtanganiko ra·bagen ine ka·dongchakani giminsa ia dilgiparangko seokachim, uni gimin ia changde dilgipako seokani namen dingtangna siengaha. Politics-ni gita kal·aniko manderang nikmanahani gimin re·baenggipa chang election-ode obostarang namen dingtang ong·na siengaha aro angko rim·aniara angna nambata cholko on·anisa ong·skagnok,” ine re·baenggipa 2023 bilsini Assembly election-o South Tura constituency-oni Chief Minister Conrad Sangma baksa susana sienggipa Tura-ni MDC Bernard Marak parakataha.
2021 bilsini GHADC election-oba ua chegipa ong·na man·aha ine janapatengon, South Tura constituency-o a·dokni Chief Minister Conrad Sangma aro North Tura constituency-o NPP MLA Thomas Sangma susapiltaiengoba, ia changode manderang dingtanganiko nangnikengahani gimin BJP-kosa seokgen ine Meghalaya BJP-ni state vice president parakataha.
2023 bilsini election-oba uamang tangka paisa jakkalsretaniko bon·atna aro ramram manderangko bilakbatatna gita nisanko donesa susagen ineba Marak parakataha.