BAGHMARA: Jagimikna awareness aro outreach program-ko ong·atani bak gita Budbar salo, South Garo Hills a·jani District Legal Services Authority (DLSA), dingtangmancha Health Camp aro awareness program-ko Baghmara-ni samba jolo donggipa Dabram songo ong·atangaha.
Ia program-ko ong·atanio Baghmara-ni District & Sessions Judge G Rani, ia awareness camp-ko ong·atani bidingo songni manderangna agan-talate on·angengon, Law department-ni ning·o manderangna on·enggipa dingtang dingtang namgnirangni bidingo ma·siate on·na miksonganiosa ia program-ko ong·atenga ine parakataha. Kangal cholgri manderangna ainni gita dakchakanirangko indin on·engani gimin manderang, kakket bichalko ra·anio maming champengako man·jana gita iandakgipa namgnirangko manderangna u·iatna nangenga ineba Rani aganaha.
Pattoko donako man·enggipa koidirangko nokdangni manderang galchipe donenga ine bang·en badi ka·anirangko man·soenga ine janapatengon, iandakgipa koidirangna kakket bichalko on·na man·na gita uamang bakan District Jail-ona re·ange koidirangko grongegen ineba District & Sessions Judge parakataha.
Ia program-ko ong·atanio dongpae jinmana aganprakanggipa gipin manderangara, Baghmara-ni DSP FA Marak, Baghmara-ni Chief Judicial Magistrate aro DLSA-ni Secretary DS Marbaniang aro gipinrang ong·a.
Ia program-ko ong·atanio songni manderangna indin be·enni porikka ra·e nianikoba dakangaha.
