TURA: North Garo Hills a·jani Dainadubi jolo songdongenggipa manderangna dingtang C&RD Block-ko songe on·china dabie Bristibar salo, Dainadubi jolni dingtang dingtang dolrang, jolo songdongenggipa manderang baksa jinma tom·bimonganiko ong·atangaha.
Iani bidingo apsan salon, Dainadubi Block Demand Committee-ni gita Meghalaya a·dokni Chief Minister Conrad K Sangma-naba lekkako sedoataha aro Dainadubi-o November 30 tarikni gisepon gital C&RD Block-ko songe on·china gita dabiangaha.
Ia committee-ni Chief Minister-na sedoatgipa chittio parakatani gitade, Kharkutta C&RD Block-ni ning·o ga·akgipa dam 54 songrangko aro Resubelpara C&RD Block-ni ning·o ga·akgipa dam 51 songrangko ma·ekate, gital Dainadubi C&RD Block-ko songchina gita 2018 bilsionin dabiengahachim indiba da·alonan Dainadubi jolo songdongenggipa manderangni dabianiko sorkari chu·sokate on·kujaengachim.
“Kharkutta aro Resubelpara C&RD Block-rangoniko ma·ekate Dainadubi Block-o napatchina chingni dabienggipa songrangara, Kharkutta aro Resubelpara block damgnionin kilometre 30-oni 40-mang chel·grikani a·sel ia songrango donggipa manderang maming namgnirangko man·jaengani giminsa chinga ia songrangko man·chape gital Dainadubi C&RD Block-ko songchina dabienga,” ine Dainadubi Block Demand Committee-ni dilgiparang parakataha.
Dainadubi C&RD Block-ko songchina gita bilsibrina kingking changni chang memorandum-ko a·dok sorkarina on·atahaoba da·alonan ia dabianiko chu·sokate on·kujaenga ine janapatengon, ia dabianiko chu·sokate on·kujaskal, Dainadubi jolo songdongenggipa manderang neng·takjawa aro mikkangchi bilakbate jingjengatanirangko dakanggen ineba committee-ni dilgiparang mikrakataniko on·angaha.
Dainadubi block-ko dabie jolo songdongenggipa manderang jinma tom·bimonga
Date:
Share post:
