BAGHMARA: South Garo Hills a·jao Agriculture department-ni gita Vehicle Scheme-na Integrated Village Cooperative Society (IVCS)-rangko seokanio interview-o dongpagijagipa Gangga IVCS-kosa seokskaaha ine Baghmara Block-ni ning·o donggipa dingtang dingtang IVCS-rang suk ong·gijaniko parakatenba, iani bidingo inquiry-ko dakate, Vehicle scheme-ko kakket bewalo on·china South Garo Hills a·jani Deputy Commissioner-na sedoataha.
Iani bidingo Baghmara Block-ni ning·o donggipa dol 10 IVCS-rang, South Garo Hills a·jani Deputy Commissioner-na badi ka·e sedoataha aro ia IVCS-rangara, Chigitchakgre, Dorenggo, Katchi Gurantai, Dabram, Eringgre, Dasangre, Chibasal, Balkal Asim, Goka aro Memang Koksi IVCS Ltd-rang ong·achim.
Ia dol 10 IVCS-rangni Deputy Commissioner-na badi ka·doangani gitade, South Garo Hills a·jani District Agriculture office-ni gita re·anggipa September jani 27 tariko Meghalaya Agriculture Response Vehicle Scheme-na interview-ko ong·atangahachim aro ia interview-o Baghmara Block-ni ning·o donggipa dol 10-na baten IVCS-rang bakko ra·angahachim.
Ia interview-ni result-ko re·anggipa November-ni 14 tariko parakaha indiba result-ko parakanio, interview-ko mikkangpagijagipa Gangga IVCS-kosa seokskaaha ine ia dol 10 IVCS-rang parakataha.
“Ia scheme-na interview-ko ra·gipa IVCS-rangko seokgija, interview-ko ra·gijagipa IVCS-kosa seokahani gimin chinga iako raken jegalenga aro iani bidingo inquiry-ko dake, ia scheme-ko kragipa IVCS-na on·china didienga,” ine Baghmara Block-ni ning·o donggipa dol 10 IVCS-rang parakataha.
