TURA: Garo Hills-ni ning·o seokako man·gipa dingtang dingtang songrangna aro manderangna Payment for Ecosystem Services (PES)-ni cheque-rangko, Bristibar salo, a·dokni Chief Minister Conrad Sangma-ni jakchi, Tura-ni District Auditorium-o suale on·angaha.
Samtangtango ong·telaigiparangko aro buring bolgrimrangko ripinganio songni nokni manderangna tangka paisani gita dakchakanirangko on·na a·dok sorkari, dingtangmancha Green Meghalaya scheme-ko a·bachengatahachim ine nikna man·a.
PES-ni cheque-rangko suale on·na gita program-ko ong·atanio a·dokni Chief Minister, jinmana aganprakatengon, samtangtango ong·telaigiparangko skang chasongrangonin songni nokni manderangan nirok sandienggiparang ong·ani gimin buring bolgrimrangko aro samtangtango ong·telaigiparangko ripinge rakkina gita ia bilsio Green Meghalaya scheme-ni ning·o gong crore 50 tangkarangko chame donaha ine parakataha.
Samtangtango ong·telaigiparangko aro buring bolgrimrangko ripinganio songni nokni manderangna tangka paisani gita dakchakanirangko on·na gita a·dok sorkari, Green Meghalaya scheme-ko a·bachengataha ine janapatengon, ia tangka paisarangchi songni nokni manderang, buring bolgrim, chiring chibisik aro uandake samtangtango ong·telaigiparangko ripinge rakkina man·skaenga ine Sangma parakataha.
Chief Minister-ni parakatani gitade, ia Green Meghalaya scheme-na Community-Led Landscape Management Program-ni ning·o World Bank-ni gitaba tangka paisarangko dakchake on·enga aro komibeoba hectare 5-mangni gita buring bolgrimrangko man·chapgipa a·ani nokgiparangna, uamangni a·a dal·a dal·jani kri bilsi 5-na tangka paisani gita dakchakanirangko on·gen.
Bristibar salo, Garo Hills gimikoni dam 298 songrang gong crore 6-mangni gita tangka paisarangko man·aha ineba Chief Minister parakataha.
Ia tom·anio West Garo Hills a·jani Deputy Commissioner Swapnil Tembe-ba dongpae jinmana aganprakangengon, ia scheme-ni ning·o on·enggipa tangka paisarangko name jakkalchina aro songtangtango buring bolgrimrangko tange rakkianiosa jakkalchina gita manderangko didiataha.
Ia tom·anio dongpae bakko ra·anggipa gipin manderangara, GHADC-ni Chief Executive Membor Albinush R Marak, Tura Municipal Board-ni Chief Executive Officer Rikse R Marak, Nokma Council-ni membor-rang, district official-rang aro gipinrang ong·a.
