SHILLONG: Assembly election-rang ong·na mikkango jemangan uamangni party-rangko watna aro BJP-o napskana pilakon tarienggipa sak gittam MLA-rang baksana Baghmara-ni MLA, Samuel M Sangma-ba mikkang jao BJP-ona napna nidingenga.
Baghmara-ni MLA, Samuel M Sangma mija Sukrobar salo New Delhi-o party-ni a·gipi dilgiparangko grongaha aro party-o napani gimin agangrikaha, kobor ra·timgiparang aganaha.
Uni party-o napani gimin adita koborrangko man·aha.
Samuel M Sangma Baghmara-oni independent candidate ong·e 2018 Assembly election-o cheaha aro election ja·mano ru·utgijaan UDP-o uamangni associate membor ong·e bakrimaha.
Baghmara MLA baksana, Trinamool Congress MLA-rang Himalaya M Shangpliang (Mawsynram), aro NPP legislator-rang Ferlin CA Sangma (Selsella) aro Benedict R Marak (Raksamgre) uamangba December jao BJP-o napnaba donga.
Da·o ong·enggipa legislator-rang New Delhi-o official-ni gita napgen aro party dilgiparangni choljokao pangchake December 3 tariko party-o napani programme-ko ong·atnasinga, koboro u·iataha.
Ia chango Meghalaya-o BJP uamangni tally tang·dochongmotgen ka·donganiko janapaha, Ma·mongni BJP party-o napatchina Meghalaya-o pilak MLA-rangko chu·gimik didiaha, ru·utgija salo koboro u·iataha.
Maibakai da·o ong·enggipa MLA-rang bang·bataan party-o napojok ja·manode ja·manchakgnok ine agane napchina didiako jechakahachim aro sakgipinrang Meghalaya-o BJP-ni pangchakani mangrakkujaenga ine aganahachim.
BJP-chi didiako man·gipa, da·o ong·enggipa MLA-rangni aganani gita mitam MLA-rang jemangan party-o napchina aganako man·e ra·chakaha uamang election-rang ong·na jabrimangsanjok party-o napchina Ma·mongni BJP dilgipani aganako man·aha ine aganaha.
“Dingtangmancha party-ni candidate ong·e angni constituency-o anga an·tangan bang·a manderangni chakpaako man·manahao maikai anga party-ko dingtang ra·na man·gen, da·o bon·kamgipa somaio election ong·na skang ja dokna skangan angko nangnikode uamang angko agana nanga,” uni BJP-o napna amako aganchina mol·molako man·e MLA aganchakaha.
