SHILLONG: ‘Da·odipetde Mairang aro South Shillong-na candidate-ko chakatatna chanchia dongkujaenga, NPP da·o ong·enggipa sakgittam MLA-rangna party ticket-ko on·jawa ine NPP State President, WR Kharlukhi, aganaha.
North Shillong-na dingtang dingtang committee-rangko songani ja·man Sonibar salo kobor ra·timgiparang baksa agangrikmitingo, NPP-ni MLA-rang gipin political dolona napna miksongengani gijmin janapatao, indine aganaha, “ua MLA-rangde elec tion-o party ticket-ko man·jawa ine u·ie, gipin party-oniko cholko ra·na jotton ka·giparangsa ong·a.”
Mikkang bilsi January jao gipin gipin political dolni sak 8 MLA-rang NPP-o napna am·enga, ia changde party, ge 54 seatrango susana miksongenga ine Kharlukhi aganaha.
Uandake NPP, Mairang aro South Shillong constituency-o darang candidate-ko chakatatjaengani gimin, NPP-ko UDP aro BJP baksa maiba donnue soi ka·grika dongama ine sing·on? Kharlukhi, indine aganchakaha, “chinga maming soi ka·grika dongja, da·odipetde election-ko chakatatna miksongani dongkujaenga indiba election-na jagni somoi dongkuenga.
Indake ong·engon Agatha Sangma-ni Parliament-o Citizenship Amendment Act-na chakani gimin sing·on, Kharlukhi indine aganchakaha, “Agatha, ia Act-na chaknaba donga indiba party, maming saloba CAA-na chakpajawa, iani bidingo Chief Minister, North East-ni gimik Chief Minister-rang baksa ia Act-ko jegalna gita tom·aha.
“Anga an·tangba ia Act-ko maming saloba ra·chakjawa. Agatha-ni namnikpaani gimin party, namnikpaa inede ong·ja.”
Iarangni gisepon ua an·tangba NDA sorkarini kam ka·aniko namnikjani chinko parakate, Kharlukhi, “NEHU-na joltangni VC-ko seokna mol·molataniko ma·mong sorkari jechakataonin, anga NDA sorkarini ge·samangba meeting ba tom·anio bak ra·a dongja” ine aganaha.
