SHILLONG: Dawki-ni dingtang dingtang nitobe-gipa biaprangko nina gita re·bagipa tourist-rang, mni Sukrobar salo, garirangko ro·ong gotatani gimin kentokaha. Komibeoba bol 8-10 tourist garirangko ro·ong gotataha, jeon saksa tourist saknaaha. Dawki-Riwai ramajolo donggipa Brohill Falls-o ong·gipa ia obostani photo aro video-rang socia media-o gipangaha. Indake Assam Tourist Taxi Association, tourist driver-rangko ua biapona re·angjachina beng·tokaha.
Ro·ong gotatani a·sel adita bol garirangni windshield nosto ong·tokaha.
Tourist driver-rangoni saksa Ajay Singh minggipa, a·sel ong·ani gimin parakatengon, “Chingni Borhill Fall-ona re·ange Shillong-ona pilbamitingo tiktak somoio ia obosta ong·aha, angni gario songregipa gipin a·dokni me·chik a·sel ong·ao jokkom ong·aha ine aganaha.
“Iandakgipa obosta ong·arangko batanggimin salrango knarongachim, indiba da·osa ro·ong gotatani obostako mikron-tangchi nikna man·aha. Ro·ong gotatgiparangko darangkoba nikja uamang buringoni dongnuesa tourist garirangko ro·ong gotataha ine Singh aganaha.
Ong·a obostani bidingo chinga Pynursla police station-o mamlako segataha.
Indake police-rang ia ong·a obostani gimin sandion, mitam bi·sarangsa tourist garirangko ro·ong gotataha ine aganaha.
Police team, tourist gariko salgipani badi ka·anio am·sandina gita ua biapona sokangaha, unon bilsi 12 ong·gipa bi·sa-rangsa ro·ong gotata ine u·ina man·aha. Nongtyngur aro Mawlynnong-ni Rangbah Shnong- uamang Nongtyngur songo ia mam-lani gimin chanchirimna tom·dakaha indiba uamang ro·ong gotatgipa bi·sa-rangko sandion u·ina man·jaha. Indake Sonibar saloba ia apsan bidingo chanchirimna tom·taiaha.
Indake ong·engon ia ong·a obostani bidingo Pynursla police station-o FIR-kode segata dongja, tourist gari salgipa ku·sikchi aganachisan badi ka·a ine talataha.
Shillong songjinmao November 24 tarikoni 26 tarikona ong·atnasieng-gipa Cherry Blossom Festival-na chelchak-naljokanirangko bilakatani somoio iandakgipa obosta ong·ako nikna man·aha.
Indake ong·engon SP (City) Vivek Syiem, The Shillong Times-ni kobor ra·timgiparang baksa agangrikao, songjinmao tom·tomaniko rakkina aro iandakgipa obosta ong·arangko chelchakna niam-ainko name daken nirokenga ine aganaha.
