SHILLONG: National People’s Party (NPP)-ni survey ka·aniko ma·sina man·ani gitade, 2023 bilsini Assembly election-o Garo Hills-o seat dambonga damdokmangkosan chena man·aigen ine Opposition Trinamool Congress (TMC)-ni dilgipa Mukul Sangma-ni agananiko, Sonibar salo NPP-ni state president WR Kharlukhi raken jegalataha.
2023 bilsini Assembly election-o NPP, Garo Hills-o dambonga ba damdokna bate seat-rangko chena man·jawa ine janapatengon, “Iako NPP doltangni survey ka·anion ma·sina man·aha aro ian angni sandie man·gipa ong·ja,” ine adita salrangna skangsan TMC-ni dilgipa Mukul Sangma, TMC-ni tom·bimonganiko Rajabala-o ong·atanio aganahachim.
Iandake Sangma-ni agananiko jegalatskaengon, “Ia survey-ko NPP ka·aha ine ua aganenga ong·ode uaba NPP-ni membor-sa ong·a aro TMC-ni membor ong·ja. Indide maikai ua NPP-ni survey ka·aniko ma·sina man·genchim,” ine Kharlukhi parakataha.
2018 bilsio Congress dol, dam 20 seat-rangko cheahachim indiba ja·mano uamangoni bang·batan All India Trinamool Congress (AITC)-ona katskaaha ine janapatengon, iani gimin da·o Garo Hills-o bang·a manderangan uamango ka·dongchakna man·tokjaengaha ine NPP-ni state president parakataha.
Da·o TMC-ni dilgiparangko Garo Hills-ni manderang dake nina siengkua ine janapatengon, ua (Mukul) an·tangba an·tangni constituency-ni bidingo name hisape nichina ong·jaode ua an·tangni seat-koba gimaatsrangnaba gnang ine Kharlukhi mikrakataniko on·angaha.