SHILLONG: Meghalaya a·doko Trinamool Congress (TMC)-ni bang·a dilgiparangan National People’s Party (NPP) aro gipin dolrango bakan napna siengani gimin TMC be·grugen ine Robibar salo, a·dokni Chief Minister aro NPP-ni national president Conrad K Sangma parakataha.
“Meghalaya a·doko mongsonggipa opposition Congress dolni bang·bata dilgiparangan TMC-o napangahani a·sel da·o tong·sade bon·aha aro da·o TMC-ni bang·a MLA-rangba NPP aro gipin dolrango napna siengaha. Uni gimin TMC-ba a·doko be·gruangkugen. Ian uamangni bilakanikoma bilgrianganiko mesokenga angade ma·sija. Manderangsa ukode aganaichinaha,” ine Robibar salo, a·dokni Chief Minister kobor ra·timgiparangna aganaha.
Meghalaya a·doko opposition dolni gisepo bak daka gita ong·engaha ine janapatengon, kim·kimgipa opposition dol dongjagenchimode manderangni gisepo ka·donganirangba dongja man·ja ine Chief Minister parakataha.
“Salgro salaram a·dokrango aro mongsongbate Meghalaya a·dokni politics-ko niatgenchim ong·ode, TMC dolara re·bagitalgipa dol gitasan ong·enga. Batanggimin somoirangoba TMC-ko a·doko ja·dil su·na jotton ka·ahachim indiba pangkamgipa ong·na man·chipkuja. Uni gimin ia election-oba ia dolko manderang ra·chakna man·kujawa,” ine Sangma aganaha.
Meghalaya a·doko TMC sorkariko rikgen ine agananiara uamangni gualanisa ong·enga ine janapatengon, TMC dolara salgro salaram jolrango gital dol gitasan ong·kuengani gimin uamangko ra·chakna gita somoiko nangkugen ine NPP-ni national president parakataha.
“Indake ong·genchimoba, NPP-ni president aro Meghalaya a·dokni chief minister ong·e anga gipin dolrangko maming saloba chone ra·gipa ong·ja ine pangnan aganronga aro election-rango susaengon, an·ching darangkoba mikchepgija bilaken susana nanga,” ine Sangma aganaha.