Skulni curriculum-o salgro salaramni matgrikrangni gimin janapchina CM ku·pattia

SHILLONG: A·songni curriculum-o salgro salaram jolrango donggipa matgrikrangni gimin janapa komikuengani a·sel a·songni gipin bakrango salgro salaram jolrangni gimin name ma·sitokbrekujaenga ine Robibar salo, a·dokni Chief Minister Conrad K Sangma parakatenba, skulni curriculum-o salgro salaramni matgrikrang aro dingtang dingtang itihasrangko bang·bate segatchina ku·pattianiko on·angaha.
Robibar salo ua, Guwahati songjinmao ong·atanggipa Purvottar Swabhiman Utsav-o bakko ra·angenba, jinmana aganprakangengon, ia sal somoirango salgro salaram a·dokrango itihasni gita neng·nikanirangko namatna man·enga aro a·songko rikanio mongsonggipa bakko ra·paengaha ine parakangaha.
“A·songni curriculum-o salgro salaram a·dokrango donggipa matgrikrangni bidingo bang·e janapa dongbrejachim indiba da·o ma·mong sorkari, salgro salaram jolo donggipa matgrikrangni gimin segipa itihasrangko ra·dona kam ka·engahani gimin ian a·songni gipin bakrangko salgro salaram a·dokrang baksa nangdimatna dakchakani ong·gnok,” ine Chief Minister aganaha.
Dambe bi·sarangni niksamsoanirangko tarisona man·na gita bi·sarangko cultural exchange program-rango bak ra·atchina gitaba Chief Minister didiangaha.
An·tangni Israel a·songona re·angani somoio holocaust museum-ko nikbagipani gimin janapatengon, ia museum-ko Israel sorkari, Jihudirangni ong·baani aro dingtang dingtang neng·nikanirangko chagrongna nanggipani bidingo bi·sarang ma·sie ra·china gita tariaha ine Chief Minister parakataha.
“Southeast Asia-ona cholguga ong·atna gita salgro salaram jolrango man·gipa dingtang dingtang cholrang gnang indiba salgro salaram a·dokrang aro Southeast Asia-ni gisepo re·a doani kolrangko namdapatna nangenga,” ine Sangma aganaha.
Chief Minister-ni parakatani gitade, salgro salaram a·dokrangara gipin a·songrang baksa nangchapgipa jol ong·ani gimin gipin a·songni bading chiwalgiparangna ia jolrango invest ka·na cholrangkoba on·enga aro ian salgro salaram a·dokrangna man·dapani ong·skaenga.