TURA: Meghalaya a·doko All India Cooperative Week manianiko Sonibar salo matchotataha aro ia manianiko matchotatani bak gita Cooperation department, Meghalaya Cooperative Apex Bank, Rural Financing, Megha-LAMP aro MBMA bakrimenba, dingtangmancha exhibition-ko Tura-ni Parade Ground-o ong·atangaha.
Ia manianiko matchotatani salo West Garo Hills a·jani Deputy Commissioner Swapnil Tembe, mongsonggipa sokgipa ong·e jinmana aganprakangengon, ku·cholsan ong·e kamko ka·genchimoba bang·bata namgnirangko man·a aro chu·sokani cholrangkoba bariata ine parakangaha.
Gipinrang pangchakgipa ong·jana gita an·tangtangan bimchipe kam ka·giparang ong·china gitaba ua didiangaha.
West Garo Hills a·jao man·enggipa cholrangni gimin janapatengon, West Garo Hills a·jao 2027 bilsini gisepode an·tangtangon chu·ongnikgiparang ong·na gita dingtang dingtang mission-rangko a·bachengataha ine Deputy Commissioner parakataha.
Ia program-ko ong·atanio Union Home Minister Amit Shah aro National Cooperative Union of India-ni Chief Executive Officer Sudhir Mahajan-ni watatgipa koborrangko, Senior Cooperative Officer sakgni, chong·motan Rakhi Ch Momin aro BD Sangma, jinmana poraiataha.
Ia program-ko ong·atanio, dolgittam nambatgipa Integrated Village Cooperative Society (IVCS)-rangna, chong·motan West Garo Hills a·jani Nangrimesa IVCS, East Garo Hills a·jani Asil Dikkagre IVCS aro South Garo Hills a·jani Katchi Garantai IVCS-na Deputy Commissioner-ni jakchi boksisrangkoba on·angaha.
Ia tom·anio seokako man·gipa dol 10 IVCS-rangna micro ATM-rangkoba suale on·ataha.
