SHILLONG: Meghalaya Public Service Commission (MPSC)-ni gita kamrangko on·anio maming dongnuani dongjana gita interview-rangko ra·anio video ka·e ra·na MPSC-ni Chairman Paul Reader Marwein ku·rachakaniko on·ataha.
Sombar salo, Federation of Khasi Jaintia & Garo People (FKJGP)-ni dilgiparang, dingtang dingtang department-rango bangbang ong·e dongenggipa kamrango kam ka·giparangko gapatchina aro kam ka·giparangko ra·anio maming dongnuani dongjachina gita didie, MPSC-ni chairman-ko grongeani somoio ia ku·rachakaniko on·ataha.
MPSC-ni chairman-ko grongeani ja·man kobor ra·timgipa manderang baksa agangrikengon, bangbang ong·e dongenggipa ge·bri ba ge·bonga kamrangnan dorgastoko galgipa candidate-rang sak 20,000-na batani a·sel kamrang ja·manchakatako man·enga ine MPSC-ni chairman aganaha ine FKJGP-ni president Dundee Cliff Khongsit parakataha.
Khongsit-ni aganani gitade, dorgastorangko office-rangchi re·e galna nangengani a·sel somoirangko bang·bate nangengani gimin dorgastorangko internet gita galna MPSC-o Information Technology (IT) cell-ko kulichina gitaba uamang MPSC-ni chairman-ko didiangaha.
Interview-ni result-rango candidate-rang kusi ong·jagenchimode video-rangko nie ra·na man·na gita interview-ni video-rangko ka·e ra·china didion, ua MPSC-ni interview-rangko video chipe ra·na gita ku·rachakataha ineba Khongsit parakataha.
