SHILLONG: West Jaintia Hills a·jani gital Namdong C&RD Block-ko Sombar salo, a·dokni Chief Minister Conrad Sangma-ni jakchi songe on·angaha aro ia block-ko songe on·anganio a·dokni Urban Affairs Minister Sniawbhalang Dhar, Jowai-ni MLA Wailadmiki Shylla aro gipin dilgiparangba dongpae bak ra·angaha.
Ia apsan somoion ua Namdong CHC-koba nokdonggae on·angaha aro Jowai-Nartiang-Kdiap-Khanduli ramako taridapna gita pangchakaniko songe on·angan baksana Greater Mukhnang Lumrot Water Suppy Scheme-naba pangchakaniko songe on·angjolaha.
Ia gital Namdong C&RD Block-ko songe on·anganio a·dokni Chief Minister, jinmana aganprakangengon, West Jaintia Hills a·jao Namdong C&RD Block-ko songaniara, ia jolrang songdongenggipa manderangna sorkarini kamrangko sepangbatatani gita ong·gnok ine parakangaha.
“Ia Namdong C&RD Block-ko kulianichi ia jolo donggipa songrangna aro manderangna namroro silroroaniko ra·bana gital cholrangko on·gnok,” ine ua aganaha.
Ia block office-o kamrangko a·bachengjolatgnok ine janapatengon, dingtang dingtang neng·nikanirangko chagrongna nanggenchimoba, a·doko namroro silroroani ra·bana gita uni sorkari, dingtang dingtang block-rangko kulie on·enga ine Chief Minister parakataha.
