Aminda Rangsa songo bija jilani gimin skie on·enga

TURA: West Garo Hills a·jani Gambegre C&RD Block ning·o donggipa Aminda Rangsa songni Multi Facility Centre-o November 21 tarikoni a·bachenge, re·baenggipa November 26 tarikona, songni nokni manderangna bija jilaniko skie on·na gita Intensive Bee-Keeping Training program-ko ong·atenga.
Ia training program-ko Tura-ni District Commerce & Industries Centre (DCIC) baksana North Eastern Hill University (NEHU) Tura Campus-ni Incubation Centre nangrime ong·atenga.
Apiculture Mission-ni Nodal Officer aro Tura DCIC-ni Functional Manager Frederick A Sangma-ni u·iatani gitade, West Garo Hills a·jao sak 100 bija jile cha·giparangna batch gni dake training-ko on·manaha aro da·o sak 50 bija jilgiparangna Aminda Rangsa songo training-ko on·e, training matchotahaon bija jilani bosturangko suale on·anggnok.
Ia training program-ko ong·atna gita Chattisgarh a·dokni Raipur-o donggipa National Institute of Biotic Stress Management (NIBSM), NEHU Tura Campus-ni Incubation Centre baksa nangrime tangka paisarangko dakchake on·enga aro ia program-ko Tura-ni DCIC jako ra·e ong·atskaenga ineba ua u·iataha.
Gambegre C&RD Block-ni ning·o donggipa Chigitchakgre, Aminda Rangsagre, Aminda Simsang, Nengja Bolchugre aro Dilnigre songni manderangna janggi tangani cholrangko on·na aro songni samtangtango ong·telaigiparangko ripingna gita ia dambonga songrangko NEHU Tura campus aro Tura-ni DCIC jako ra·aha ineba Sangma parakataha.

Get real time updates directly on your device, subscribe now.

Comments are closed.