SHILLONG: Re·anggipa Mongolbar pringo, West Jaintia Hills a·jani Mukroh songo Assam police aro forest guard-rangni goanio Meghalaya a·dokni sakbonga manderang so·otako man·ani ja·man Khasi Hills-ni dingtang dingtang biaprango so·sojengjeng ong·anirangko nikna man·engani gimin Meghalaya a·dokona aro mongsongbate Khasi, Jaintia aro Ri Bhoi a·jarangona petrol ra·baaniko dontongna gita Assam Petroleum Mazdoor Union ka·mikkenataha.
Mukroh songo a·sel ong·ani ja·man, Assam-o register ka·gipa gari baksana dingtang dingtang garirangkoba Shillong songjinmani dingtang dingtang biaprango, ma·sina man·gijagipa manderang so·chipe galahachim.
Koborko on·ani gitade, Budbar saloba Meghalaya a·dok ning·o donggipa songni manderang, ka·a ding·chaoenba, Assam a·dokni West Karbi Anglong a·jao donggipa forest office-koba so·chipa galaha aro Mukroh songoba adita garirangko songni manderang so·chipe galaha.
Meghalaya a·dokona re·baenggipa Assam-ni garirangko chadrapenga ine koborko man·soani ja·man, Assam-ni garirangko Meghalaya a·dokona re·bakujachina gita Assam police u·iataha aro uandaken Budbar salonin, Assam-ni garirang, mongsongbate manderangko salruragipa garirang, Meghalaya a·dokona re·batokjaengahachim.
Iandakgipa obostarang ong·engani gimin Meghalaya a·dokona petrol aro diesel-rangko salbaenggipa garirangna nanga gita chel·chakanirangko on·china Assam Petroleum Mazdoor Union, Meghalaya sorkario dabiangaha aro chel·chakanirangko on·na man·jagenchimode petrol salbaaniko dontongatchenggen ine ka·mikkenataniko on·angaha.
Indake ong·engon, Mukroh songo a·sel ong·ani ja·man petrol aro diesel-rangko ra·baenggipa Assam-ni garirang, Meghalaya a·dokona re·bana man·kujaengani a·sel West Khasi Hills a·jani headquarter Nongstoin-ode petrol-rang bon·changna a·bachengengaha ine kobor on·timgiparang u·iataha.
Koborko on·ani gitade, Nongstoin-ni badiaba badiaba petrol pump-rango petrol aro diesel-rang bon·changna a·bachengengahani gimin manderang kenjagokenba, petrol-rangko ra·e donna gita petrol pump-rango bang·en riting dakanirangko nikna man·aha.