SHILLONG: Re·anggipa Mongolbar pringo, West Jaintia Hills a·jani Mukroh songo, Assam police aro forest guard-rangni dosgri manderangko goe galani gimin jegale, Hynniewtrep Integrated Territorial Council (HITO) dolni gita, Sonibar salo Shillong songjinmao donggipa Madan Iewryngkhep, Fire Brigade-oni Dhanketi Assam House-ona tom·tome re·jomaniko ong·atenga ine u·iataha.
Ia re·jomaniko Sonibar attam 3:00 bajioni ong·atenga ineba HITO-ni dilgiparang u·iataha.
Jinma re·joma matchotani ja·man joljol Assam House-o mombatirangko so·e jinma tom·bimonganikoba ong·atanggen.
Iani bidingo u·iataniko on·angengon, Mukroh songo Assam police-rangni skatang goaniko jegalna gita mikkangchiba dingtang dingtang dake jingjengatanirangko dakangkugen aro iani bidingo Sonibar salo jinmana u·iatgen ine HITO-ni president Donbok Dkhar parakataha.
Mongolbar pringo, Mukroh songo Assam police aro forest guard-rangni skatang goanio songni sakbonga manderang so·otako man·ahachim aro ia a·sel ong·anio Assam-ni forest guard saksaba siangna gita nangahachim.