SHILLONG: Garo Hills Autonomous District Council (GHADC)-ni gitcham chief executive membor (CEM) Dipul R Marak aro gitcham MDC Sukharam K Sangma baksana gipin dilgiparang, Sombar salo, Bharatiya Janata Party (BJP) dolo napangaha.
BJP-o napanggipa gitcham MDC sakgni, chong·motan Dipul R Marak aro Sukharam K Sangma sakgnian, National People’s Party (NPP)-ni gitcham MDC-rang ong·achim aro uamang sakgnian re·anggipa 2021 bilsini GHADC election-o amako man·rikahachim.
GHADC-ni gitcham MDC sakgni baksa saksa ja·delgipa ukil VGK Kynta aro kamoni neng·takgimin sorkari official-rangba ia apsan salon BJP-o napangaha aro uamangko rimchaksona gita dingtangmancha tom·aniko Shillong songjinmao donggipa BJP-o office-o ong·atangaha.
Ia tom·anio BJP-ni national secretary Rituraj Sinha, BJP-ni national vice president aro Meghalaya a·dokni in-charge M Chuba Ao baksana BJP-ni MLA AL Hek, Meghalaya BJP-ni state president Ernest Mawrie aro gipin dilgiparangba dongpae BJP-ona re·bagipa dilgiparangko rimchaksotokaha.
