TURA: West Garo Hills a·jani Dalu Civil Sub-Division aro South West Garo Hills a·jani Purakhasia C&RD Block-ko mijal Bristibar salo, a·dokni Chief Minister Conrad K Sangma, program minggni ong·atanio do·ga oe on·angaha.
Ru·uta bilsirangna skangonin Dalu-ko civil sub-division songchina dabiani gnangchim indiba sub-division-ko dabidilgiparang dingtang dingtang obostarangni a·sel dabianiko donchipna nangahani gimin 2017 bilsini October 21 tariko gital committee-ko songtaie Dalu sub-division-ko dabina a·bachengpiltaiahachim.
Dalu block-ni ning·o square kilometre 59700 biapko man·a aro iani ning·o dam 188 songrang aro dam 15 Gram Sevak circle-rang gnangchim. Dalu block-ni ning·o gimik ge 9660 nokdangrang gnang aro ia block-ni literacy rate ba skia pora donganiara 70.68 percent ong·achim. Ia block-ni ning·o dam 21 pre-primary skulrang, dam 217 lower primary skulrang, dam 66 middle skulrang, dam 15 high skulrang, dam 5 higher secondary skulrang aro dam 1 Arts college-ba dongachim.
Indake ong·engon, indita bilsirangna ia jolrango songdongenggipa manderangni dabianiko sorkari knachakenba, ia Dalu Civil Sub-Division-ko mijal Bristibar salni bako a·dokni Chief Minister Conrad K Sangma-ni jakchi do·ga oe on·angaha.
Ia gital sub-division-ko do·ga oe on·angani somoio a·dokni Chief Minister, jinmana aganprakatengon, a·doko pilakni gitan namroro silroroaniko ra·bana gita sorkarini kamrangko songadam nokadamrangona sepangbatate on·enga ine parakataha.
Dalu-ko Civil Sub-Division songahani gimin da·o ia sub-division-ni ning·o donggipa dingtang dingtang songrango sorkarini kamrangko nambate chu·sokate on·na man·gnok ineba Chief Minister parakataha.
Iana skang a·dokni Chief Minister, South West Garo Hills a·jani Purakhasia C&RD Block-koba do·ga oe on·angaha aro ia gital block-na Border Area Development department-ni on·gipa office nokkoba ua niangjolaha.
Ia gital Purakhasia C&RD Block-o South West Garo Hills DRDA-ni Project Director RZD Shira, block development officer ong·e kamko jako ra·angkugen.
Dalu Civil Sub-Division aro Purakhasia C&RD Block-ko do·ga oe on·angani somoio ua, dingtangmancha FOCUS card-rang baksana PROGRESS scheme-ni wak bi·sarangko aro kuroiler do·orangkoba suale on·angjolaha.