SHILLONG: Assam a·dokni Chief Minister Himanta Biswa Sarma, Mukroh songo a·sel ong·anichi duko ga·akenggipa nokdangrangna aro Meghalaya sorkarina pilak nanga bakrimaniko on·na ku·rachakaha ine Budbar salo, Meghalaya a·dokni BJP parakataha.
Mukroh songo a·sel ong·anichi siangna nanggipa aro saknaa man·gipa manderangna kakket bichalko on·na gitaba ua ku·rachakaha ine BJP-ni dilgiparang u·iataha.
Koborko on·ani gitade, Budbar salo Meghalaya BJP-ni state president Ernest Mawrie-ni dilanichi dolsa BJP dilgiparang, Assam a·dokni Chief Minister-ko Guwahati songjinmao grongenba, minggittam dabiani donggipa memorandum-koba on·angjolaha.
Mawrie-ni parakatani gitade, uamangni minggittam dabianirangoni skanggipara, Mukroh songo dosgri manderangko gogipa Assam police aro forest guard-rangni kosako rakgipa ja·kurangko de·china, gnigipara Meghalaya a·dok ning·o rikgipa Assam forest office-ko ra·galchina aro gittamgipara duko ga·akenggipa nokdangrangna dakchakanirangko on·china dabianirangan ong·achim.
Mukroh songo dosgri manderangko gogipa Assam police aro forest guard-rangni kosako ja·kuko de·china dabigipani bidingode Assam sorkari, SP-ko gipin biaprangona apjitataha, OC aro forest officer-ko kam dontongataha aro CBI inquiry-ko dakna ku·rachakahani gimin ia dabianiko chu·sokata gita ong·aha ine Meghalaya BJP-ni state president parakataha.
Meghalaya a·dok ning·o rikgipa Assam-ni forest office-koba ra·galna Assam Chief Minister ku·rachakaha aro iani bidingo bakan ge·etaniko on·atna ku·rachakataha ineba Mawrie parakataha.
Meghalaya a·dok ning·o border outpost songanikoba Assam chief minister maming jechakani dongjaha ine Mawrie parakataha.
“Mukroh songo dosgri manderangko skatang goanina Assam-ni Chief Minister, raken jegalataha aro duko ga·akenggipa manderang baksana Meghalaya sorkarina pilak nanga dakchakanirangko on·na gitaba ku·rachakataha,” ine Mawrie parakataha.
