SHILLONG: National People’s Party (NPP)-ni MLA saksa wate katkugen indiba Trinamool Congress (TMC)-ni MLA sakgniko man·chape gimik sakchet MLA-rang NPP-o napskana sienga ine NPP-ni state president WR Kharlukhi a·kangataha.
Adita salrangna skangsan, Raksamgre-ni NPP MLA Benedic R Marak aro Selsella-ni NPP MLA Ferlin CA Sangma, an·tangtangni kam watani chittiko Assembly-ni Speaker Metbah Lyngdoh-na on·angahachim ine nikna man·a. Uamang sakgnian da·o BJP-o napskana siengachim.
Indake ong·engon, ia sakgittam MLA-rangni wate katgniko NPP-ni dilgiparang ma·sisoahachim aro iana uamang maming jagokmanani dongja ine Kharlukhi parakataha.
MLA sakgittam doltangko wate katgenchimoba bang·bata MLA-rang NPP-ona re·baskaenga ineba ua an·tangni ka·donganiko parakataha.
Koborrangko man·soani gitade, Phulbari-ni MLA SG Esmatur Mominin-ba NPP-oni ong·kate TMC-o napskana miksongengachim.
NPP-o napna sienggipa sakchet MLA-rangni gimin janapatengon, ia MLA-rang December ba January jao NPP-o napna sienga ine NPP-ni state president parakataha.
Ia sakchet MLA-rangni bimingrangkode ua parakna gita jechakskaaha.
Koborrangko man·soani gitade, Mendipathar-ni MLA Marthon Sangma aro Tikrikilla-ni MLA Jimmy Sangma sakgnian TMC-ko wate NPP-o napskana sienga.
Ia sakgni MLA-rang baksana NPP-o napna sienggipa gipin MLA-rangara, Umsning-ni PDF MLA Jason Sawkmie Mawlong, Mylliem-ni PDF MLA Hamletson Dohling, Congress doloniko ra·gala man·gipa East Shillong-ni MLA Ampareen Lyngdoh, West Shillong-ni MLA Mohendro Rapsang, Rambrai-Jyrngam-ni MLA Kimfa S Marbaniang aro Sohiong-ni HSPDP MLA Samlin Malngiang ong·a ine kobor man·soaha.