SHILLONG: Re·baenggipa 2023 bilsini Assembly election-na skang Meghalaya a·doko dingtang dingtang political dolni MLA-rang, dolsaoni dolsaona katpripratokengahaon, Congress dolde da·o ong·enggipa MLA-rangko nangja aro gital candidate-rangkosa susaatna sienga ine parakatskaaha.
Iani bidingo kobor ra·timgipa manderang baksa agangrikengon, ia chang Assembly election-o Congress dol 50 percent-kode gital candidate-rangna aro 50 percent-kode Ronnie, V Lyngdoh, PN Syiem, Deborah Marak, MDC-rang aro uandakgipa dilgiparangna on·skagen ine Meghalaya Pradesh Congress Committee (MPCC)-ni president Vincent Pala parakataha.
Adita MLA-rang watangani ja·man Congress dol neng·nikanirangko man·na nangaha ine ku·rachakangengon, da·o Congress dol gital dake nokko rikpiltaiskaaha ine Pala parakataha.
“NPP aro UDP gita dakgipa gipin political dolrangde, an·tangtangni gisepon dakgrike doltangtangko wate kattokenga indiba chingade noktangko rikpilskaaha. Ia sal somoirango chingni dolan, darang gipin dolrangna bate nambate tarisogipa dol ong·enga,” ine Pala aganaha.
Batanggimin somoirango bang·a MLA-rangni doltangtangoni ong·kate gipin dolrango napskaanirangko a·doko bang·en nikna man·engahachim.
Da·o dipet NPP-ni sakgni MLA-rang, doltangoni ong·kate kataha aro TMC-oniba MLA saksa ong·katahachim.
Adita salrangna skangsan, NPP-ni sakgipin MLA-ba da·o doltangko wate kattaina sienga ine NPP-ko dilgiparangoni saksa parakatahachim.
National People’s Party (NPP)-ni MLA saksa wate katkugen indiba Trinamool Congress (TMC)-ni MLA sakgniko man·chape gimik sakchet MLA-rang NPP-o napskana sienga ine NPP-ni state president WR Kharlukhi parakatahachim.
Koborrangko man·soani gitade, Mendipathar-ni MLA Marthon Sangma aro Tikrikilla-ni MLA Jimmy Sangma sakgnian TMC-ko wate NPP-o napskana siengachim.
Ia sakgni MLA-rang baksana NPP-o napna sienggipa gipin MLA-rangara, Umsning-ni PDF MLA Jason Sawkmie Mawlong, Mylliem-ni PDF MLA Hamletson Dohling, Congress doloniko ra·gala man·gipa East Shillong-ni MLA Ampareen Lyngdoh, West Shillong-ni MLA Mohendro Rapsang, Rambrai-Jyrngam-ni MLA Kimfa S Marbaniang aro Sohiong-ni HSPDP MLA Samlin Malngiang ong·a ine kobor man·soaha.